Këshilli i Lartë Gjyqësor vendos të rihetojë ankesat e bëra ndaj gjyqtarëve gjatë periudhës që ka funksionuar Këshilli i Lartë i Drejtësisë. ReportTv ka mësuar se anëtarët që do të rishqyrtojnë ankesat të cilat nuk i janë pranuar qytetarëve nga ish-Inspektoriati i KLD-s do të shqyrtohen nga anëtarët Fatmira Luli, Alban Toro dhe Dritan Hallunaj.
Me një rregullore të përcaktuar në mbledhjen e kësaj të mërkure KLGj ka vendosur të rishqyrtojë ankesat deri në ngritjen e Inspektoriatit të Lartë të Drejtësisë.
Dhe pse zyrtarisht nuk ka një shifër, janë mbi 120 ankesa të cilat pritet të kalojnë në filtrin e KLGJ-s dhe qytetarët pritet të marrin një përgjigje.
Po ashtu KLGJ ka vendosur t'i japë 5 jave leje për arsye shëndetësore gjyqtares së Durrësit Flora Hasimi.
