Mbyllja e parashkollorit në shkollën "Ndoc Mazi" në qytetin e Shkodrës ka nxjerrë prindërit në protestë. Të revoltuar ata shprehen se nuk kanë marrë asnjë sqarim nga Bashkia e Shkodrës dhe drejtoria Arsimore për mbylljen e klasës në mes të vitit shkollor.
“Asnjë sqarim. Vetëm kur kemi sjellë fëmijën prej dore. Ja ku i kemi. Na kanë thënë do i çoni filan ven, me detyrim. Vetë me qenë skllevër, jo Shqiptar”, u shpreh një qytetar.
“Absolutisht asnjë sqarim, asnjë gjë. Jemi shumë të kënaqur me mësuesen. Nuk është se nuk ka fëmijë. Nuk është se nuk ka nxënës. Ka 22 fëmijë grupi i parë. Nëse do mbylle grupin e parë, logjikisht duhet të mbyllë shkollën. Nëse mbyllet grupi i parë, mbyllet i dyti., mbyllet klasa e parë e mbyllet tanë shkolla. Çarë qëllimi kanë”, tha një tjetër.
Ata kërkojnë rikthimin e edukatores që është transferuar pak ditë më parë nga kjo shkollë.
“Ne fëmijët i kemi grupuar këtu se e kemi fill 100 metra, 200 larg shtëpisë. Se ku është halli nuk e dimë. Mësuesen na e kanë hequr. Me mësuesen nuk kemi asnjë problem”, tha një qytetar.
“Ne i kemi fëmijët këtu. E kemi shtëpinë këtu. Kopshtet tjera janë me pagesë. Disa kanë mundësi, disa nuk kanë mundësi me pagujt. Unë si pind i kërkojmë kryetares së Bashkisë, Voltana Ademi për mos me na mbyll kopshtin dhe të na sjellë edukatoren që ka qenë këtu”, u shpreh një prind.
Kopshti i shkollës “Ndoc Mazi” mbyllet nga Bashkia e Shkodrës pas 55 vitesh duke lënë pa mësim dhjetëra fëmijë të moshës 6-vjeçare.
