Një 42-vjeçar me origjinë shqiptare i përfshirë në një bandë që merrej me trafikun e drogës është arrestuar në Itali pas një urdhër-arresti europian të lëshuar nga autoritetet belge.
Efektivët e policisë në kuadër të operacioneve belge sekuestruan 100 kilogramë kokainë dhe Speed (përzierje kafeine dhe amfetamine) dhe 265 mijë euro cash.
Hetuesit gjetën gjithashtu armë, uniforma të policisë holandeze, jelek antiplumb dhe substanca kimike: duke demonstruar më tej rrezikshmërinë e bandës. Në total u arrestuan 17 persona, 11 prej të cilave në Belgjikë dhe 6 në vende të tjera. Dy persona të tjerë të dyshuar se i përkisnin të njëjtit grup u ndalua në Toskanë. Emrat e 17 të dyshuarve figurojnë në dy dosje, një nga policia federale belge dhe një nga policia lokale e Antëerp.
Thuhet se anëtarët e bandës kanë lidhje familjare me njëri-tjetrin dhe të gjithë vijnë nga Vlora. Ndërkohë që sipas mediave vendase mafia shqiptare merret me gjithçka që lidhet me kokainën: nga importi, shitja, deri tek trafiku i armëve.
Emrat e të dyshuarve nuk janë panjohur për policinë pasi në vitin 2014, krerët e bandës ishin dënuar me burgim nga 10 deri në 12 vjet; të tjerët me role të vogla kishin marrë dënime nga 3 deri në 7 vjet. Por edhe pas kësaj ata nuk u dekurajuan, përkundrazi vazhduan rrugën e tyre kriminale.
Prokuroria belge ka shprehur shqetësimin për këtë lloj klani shqiptar që tashmë është i aftë të degëzohet në mbarë botën. Kjo ndodh, jo vetëm në Evropë: por edhe në Amerikën Qendrore dhe Jugore. Prandaj ata theksojnë se ky është një fenomen që duhet mbajtur nën vëzhgim.
