Që prej vendimit të Gjykatës Kushtetuese për Teatrin, Lulzim Basha dhe njerëzit e tij në kupolën e Partisë Demokratike kanë nxjerrë nga fjalori frazën “pranga”.
E bëri i pari Basha, e më pas e përsërisin me radhë vartësit e tij, duke urdhëruar SPAk që të arrestojë me radhë të gjithë udhëheqësit më të lartë të mazhorancës: Edi Ramën, Erion Veliajn e me radhë.
Ndërkohë, nga ana tjetër, është riaktivizuar edhe “qytetari digjital” e qarqet mediaike të opozitës po i bëjnë jehonë hetimeve apo edhe operacioneve të SPAK ndaj narkotrafikut.
Normalisht, duke bërë atë që kanë thënë e vepruar prej vitesh sapo dolën në opozitë.
Ka një gjë interesante në fjalorin e opozitës së Lulzim Bashës, i cili, siç thotë, në CV ka edhe një diplomë juridiku në xhep.
Kërkon pranga dhe urdhëron prokurorët të arrestojnë kundërshtarët e tij politikë, sa herë e sheh të arsyeshme për interesat politike të partisë së tij.
Basha dhe zyrtarët e tjerë të PD-së bëhen prokurorë sa hap e mbyll sytë, madje jo prokurorë normalë që hapin dosje dhe nisin hetime, por sikur të ishin prokurorë të viteve 1945-1947, të cilët kundërshtarët i shikojnë në burg apo pushkatim.
Nuk ka asnjë zgjidhje tjetër për ta: as gjykim në gjendje të lirë apo arrest shtëpie.
Veçse, sapo kemi të bëjmë me një fabul, ku drejtësia hyn në “oborrin e PD-së”, gjithçka ndryshon.
I akuzuari është menjëherë i pafajshëm edhe pse është kapur në kushte flagrance.
Doni raste? Le të kujtojmë rastin më të freskët tragjik të 21 prillit të shkuar, kur një anëtar i strukturave të Partisë Demokratike vrau me armë zjarri Pjerin Xhuvanin në Elbasan dhe plagosi të tjerë, një ndër ta edhe oficere e Policisë së Shtetit.
PD nuk kërkoi arrestimin të paktën “preventiv” të zyrtarit të saj, por e mbrojti, e justifikoi, e homologoi vrasjen, pra marrjen e jetës me shkelje të tjera penale që PD ja ngjiti viktimës që vrau me armë i punësuari i saj.
Nuk është politik? OK, vijmë tek vendimi i Departamentit Amerikan të Shtetit për shpalljen non grata të Sali Berishës për “korrupsion të rëndësishëm”, “minim të demokracisë” dhe “pengim të drejtësisë”.
Një akuzë e rëndë, shumë, shumë e rëndë, nga një institucion shumë prestigjoz dhe më shumë se serioz.
“Duke nënvizuar qëndrimin e z. Berisha, i cili pasi shpreh keqardhjen për vendimin dhe e konsideron atë pa asnjë bazë konkrete, bëj thirrje për transparencë të plotë mbi çdo fakt e dokument që ka lidhje me këtë vendim”, tha Basha për vendimin e DASH.
Po mirë, përse këtë standard ai nuk e ka edhe për të tjerët?
Përse Basha dhe PD e njeh SPAK, sapo hetohen njerëz që kanë lidhje, apo PD mendon se ka lidhje me kundërshtarët e tij politike, apo i kërkon arrestimin e krerëve të PS kur i teket, por kur SPAK ka hetime për njerëz të saj PD, nuk e mban këtë qëndrim.
Madje PD e ka cilësuar SPAK, drejtësinë e re si një “mekanizëm në duart e Edi Ramës”.
Megjithatë, PD-ja, sa herë politikisht ka probleme me mazhorancën, e ka kthyer SPAK-un si portali “Shqipëriaqëduam”, ku ka depozituar një mal me fletërrufe që opozita i quan prova dhe denoncime juridike.
Në fakt, një parti politike në çdo vend të botës, kur bën një denoncim pret drejtësinë, madje të gjithë shkallët e saj dhe flet në fund, e jo sipas midesë.
Një parti politike nuk kërkon arrestime, por hetime, pasi është Gjykata që vendos masën e arrestit.
Nuk mund të jetë opozita një Gjykatë Paraprake, apo një gjyqtar dezhurn për të vendosur për masën e sigurisë. Një opozitë thjesht kërkon hetime, hapje dosjesh, e nëse kjo ndodh, atëherë drejtësia ka bërë rolin e saj.
Për çdo dosje ka proces, e pas një procesi ka një vendim. Të cilin politika duhet ta respektojë.
Kjo “ballo prangash” që ka shpërthyer në radhët e opozitës sapo është hequr ora policore për klubet e natës, duket si një shpërthim veror para vjeshtës, kur pritet jo thjesht të nisë stina e re politike në vend, e cila është vulosur më 25 prill, pra i ka dhënë mandatin e tretë PS-së, por sipas gjasave do të nisë një stinë edhe më e ftohtë për politikën që do të vijë nga SPAK.
A do ta luajë më “ballon e prangave” PD-ja dhe Lulzim Basha, nëse drejtësia do të hapë dosjet për njerëzit e saj?
Deri tani nuk e ka bërë kurrë. Qoftë edhe vetë personalisht Lulzim Basha me rastet që drejtësia shqiptare e ka vënë në procesverbal emrin e tij.
Sipas gjasave, kjo “ballo prangash” mund t’i qëllojë politikisht një bumerang, siç ka ndodhur tërë këto vite me kauzat e shpikura pikërisht që të pengojë drejtësinë…
