Kjo urë e rrënuar pengon lëvizjet e makinerive bujqësore e për pasojë tokat mbeten djerrë. Kryeplaku i fshatit Dervician, Filip Boboli, ka ngritur shqetësimin disa vjeçar te fermerëve, të cilët e kanë të pamundur të shkojnë tek tokat e tyre.
Ura që lidh fshatin minoritar me tokat bujqësore ka pësuar dëmtime në strukturë dhe bazament.
“Kjo urë është shumë e rëndësishme për fshatin tonë pasi fermerët e fshatit dhe blegtorët kalojnë në këtë urë. Një makineri nuk kalon dot në këtë se është gati në të shembur dhe nuk kemi asnjë ndërhyrje nga institucionet e shtetit”, shprehet kryebashkiaku.
Nga ana tjetër Llambi Ngjelo drejtor i administrimit të ujërave dhe kullotave ne Bashkinë e Dropullit thotë se kanë hartuar një projekt për restaurimin e saj por nuk ka një datë se kur do nisin punimet.
“Kemi marrë ankesat dhe nga Kryeplaku i fshatit dhe anëtarët e fshatit. Kemi nisur hartimin e projektit final në lidhje me rikonstruksionin e urës dhe në mbajtjen e vlerave të rralla kulturore që ajo mbart”, shprehet ai.
Kjo urë mbi 200 vjeçare është mbi te gjitha monument kulture njëherazi ka një rol kyç për bujqësinë dhe blegtorinë e zonës.
