Është përkujtuar në Durrës 7 Prilli, Dita e Rezistencës ndaj pushtimit fashist të vendit tonë.
Sot 85 vjet më parë, ushtria italiane pushtoi vendin tonë. Patriotët shqiptarë, të drejtuar nga Mujo Ulqinaku e pritën me pushkë pushtuesin italian, ku ra dhe Mujo Ulqinaku.
Në Monumentin e Rezistencës, që simbolizohet me figurën e Mujo Ulqinakut, u kryen homazhe në përkujtim të këtij akti.
Në ceremoni morën pjesë drejtues të pushtetit vendor si kryetarja e bashkisë Emirjana Sako, prefekti Emiljan Jani, kryetari i Këshillit të Qarkut Alfred Mullaraj, deputetë të qarkut si dhe veteranë e pinjollë të familjes Ulqinaku.
Adrian Gurra, drejtori i Kulturës në Bashkinë Durrës evokoi aktin heroik të rezistencës ndaj pushtuesit dhe ftoi pjesëmarrësit të nderonin Mujo Ulqinakun dhe shokët e tij duke vendosur kurora me lule pranë monumentit të heroit.
