Tre pikët si ilaç për ‘sëmundjen’. Kjo është ajo që do kërkojnë Tirana dhe Teuta, teksa të premten në orën 16:00 do zbresin në fushë në fushë për t’u ndeshur me njëra-tjetrën për llogari të javës së 5 të Superligës.
“Përballë janë dy kundërshtarë që këto katër javë kërkonin të kishin më shumë pikë. Teuta ka ndryshuar trajner një javë më parë dhe do fokusohemi te ndeshja e fundit që ka luajtur me Kukësin. Para dy vitesh ka dalë kampion dhe në organikën e saj ka ende lojtarë që kanë petkun e kampionit,”-u shpreh Orges Shehi, trajner i Tiranës.
Te futbollistët e Tiranës vetëbesimi është më i madh se te trajneri dhe pretendojnë se kundër Teutës opsion është vetëm fitorja.
“Nuk na interesojnë shumë ekipet e tjera. Ne duam të marrim tre pikëshin për Tiranën dhe të luftojmë deri në fund,”-deklaroi Elvi Berisha, futbollist i Tiranës.
Tirana dhe Teuta janë dy kampionet e fundit të Superligës, ndërsa pas katër javësh bardheblutë renditen në vendin e 6 me 5 pikë, ndërsa ‘djemtë e detit’ në vendin e 9 me 3 pikë.
