Zëdhënësja e Presidentit të Partisë së Lirisë, Jasmira Memelli, ka reaguar lidhur me furnizimin me ujë të pijshëm, veçanërisht në zonat turistike të vendit, duke e cilësuar atë si një “katastrofë të plotë”.
Sipas saj, mungesa e ujit dhe ndërprerjet pa paralajmërim në qytete dhe zona turistike nga jugu në veri janë pasojë e “një sistemi të kalbur dhe të shkatërruar nga korrupsioni dhe paaftësia”.
Memelli akuzoi qeverinë se ka shpërdoruar fondet publike përmes tenderëve fiktivë dhe koncesioneve mafioze dhe se premtimi i kryeministrit Edi Rama për zgjidhjen përfundimtare të problemit të ujit që në mandatin e parë qeverisës, nuk është përmbushur.
“Pas 12 vitesh, Shqipëria është i vetmi vend në Europë ku në kulmin e verës mungon uji i pijshëm. Ky nuk është vetëm dështim, por mashtrim kriminal nga një qeveri që funksionon përmes propagandës dhe korrupsionit,” deklaroi Memelli.
Ajo kritikoi gjithashtu ndërhyrjet e qeverisë në zonat turistike, sidomos në Theth, ku sipas saj po zhvillohet një fushatë agresive shembjesh strukturash pritëse, “pa paralajmërim, transparencë apo alternativa për banorët”.
Partia e Lirisë kërkon hetim për fondet e harxhuara për ujësjellësat në zonat turistike dhe ndalimin e menjëhershëm të aksioneve selektive.
“Ky vend nuk ka nevojë për propagandë, por për drejtësi dhe një qeveri që i shërben popullit”, përfundon deklarata.
Komente
