“Unë kurrë nuk kam prekur me dorë armët dhe as nuk njoh ndonjë nga personat e përfshirë, ” ka deklaruar gjatë seancës gjyqësore 28-vjeçari shqiptar Endri Elezi, i vërë në pranga për përfshirjen në sulmin terrorist të Nices.
Edhe pse në deklaratat e tij ai mohoi çdo përfshirje në sulmin vdekjeprurës , Gjykata e Apelit e Napolit urdhëroi ekstradimin në Francë për Endri Elezi, i cili u arrestua nga Policia në mbrëmjen e 21 Prillit në Sparanise, në zonën Caserta.
Ai u arrestua nën akuzën e furnizimit me armë zjarri të Mohamed Lahouaiej-Bouhlel, autor i sulmit terrorist të kryer në Nisë në 14 korrik 2016, i cili kushtoi jetën 86 personave dhe lëndoi të tjerë.
Seanca dëgjimore filloi pak pas orës 13:00, me Elezin të lidhur online me video konferencë nga burgu Poggioreale. 28-vjeçari, i mbrojtur nga avokati Francesco Fabozzi, mori fjalën për të përsëritur kundërshtimin e tij total ndaj fakteve.
Dorëzimi i 28-vjeçarit në Francë u bë për tu gjykuar për krimet e mbajtjes dhe shitjes së paligjshme të armëve të luftës.
Gjykata gjithashtu vërtetoi që Elezi nuk është përgjegjës për krimet e masakrës ose terrorizmit.
Në masakrën e 14 korrikut të vitit 2016 në Nice të Francës, humbën jetën 86 persona ndërsa qindra të tjerë u plagosën teksa një kamion qëlloi mbi turmën e mbledhur për të festuar ditën e kombëtare të 14 korrikut.
J.GJ./ReportTv.al