Një studente 24-vjeçare meksikane, María Fernanda Sánchez, është gjendur e vdekur në një kanal në Gjermani. Policia gjermane me bazë në Berlin ka njoftuar se do të kryejë një ekzaminim pas vdekjes në trupin e studentes.
María Fernanda Sánchez ishte zhdukur në kryeqytetin gjerman, ku po studionte për master, më 22 korrik. Por, një person ditën e shtunë i cili kishte dalur për shëtitje kishte gjetur trupin e saj në lagjen Adlershof.
Qindra njerëz i ishin bashkuar kërkimit, po ashtu edhe polica kishte lëshuar një njoftim kërkimi për të. Policia tha se 24-vjeçarja ishte larguar nga rezidenca e saj studentore në juglindje të Berlinit më 22 korrik.
Prindërit e Sánchez filluan të shqetësoheshin kur nuk mundën ta takonin atë të nesërmen dhe fluturuan për në Berlin për t'iu bashkuar kërkimit për vajzën e tyre. Laptopi dhe celulari i saj u gjetën në dhomën e saj.
Miq, kolegë dhe studentë shpërndanë fletushka në të gjithë qytetin me foto dhe të dhënat e studentes.
Policia gjermane deklaroi se kishte indikacione se Sánchez, pseudonimi i së cilës ishte Maffy, ishte "në një situatë psikologjike" në momentin e zhdukjes së saj. Ata deklaruan se kishin marrë 120 lajmërime për këtë rast.
Babai i saj deklaroi për mediat në Meksikë se vajza e tij kishte qenë në Berlin për rreth pesë muaj, po ashtu edhe miqtë e saj deklaruan se ajo ishte shumë pozitive dhe kishte plane të ndryshme për të ardhmen.
