Teuta kampione në fuqi ka dalë nga kriza duke mposhtur 0-1 Dinamon me një autogol në pjesën e dytë. Protagonist i këtij episodi ishte portieri Edvan Bakaj, ndërsa ‘nëndetësja’ e ka të vështirë për të dalë nga koma. Për Renato Arapin, trajnerin e Teutës, kjo ishte fitorja e parë në krye të ‘djemve të detit’.
“Me siguri që ndjehem i lumtur dhe për këtë gjë falenderoj të gjithë çunat për ndeshjen e sotme. Sigurisht që ishte shumë e rëndësishme rikthimi te fitoret pas disa ndeshjeve të mira,”-u shpreh Renato Arapi, trajner i Teutës.
“Në fund të ndeshjes ka keqardhje sepse shënuam vetë në portën tonë. Duhet të ndjehesh keq. Shpresoj që ta kalojmë edhe me pak fat këtë situatë që është edhe pozitive,”-deklaroi Bledi Shkëmbi, trajner i Dinamos.
Sfida tjetër e së martës është fituar 3-0 nga Tirana kundër Kastriotit, ndërsa java e 12 e kampionatit mbyllet me Kukësi-Laçi në ‘Elbasan Arena’. Verilindorët, të cilët renditen të dytët, e kanë detyrim fitoren sidomos pas tre pikëve të Tiranës. Në prag të sfidës ka folur futbollisti Flori Domi, i afruar nga ekipi i të rinjve.
“Laçi ka një ekip shumë të mirë, lojtarë shumë të shpejtë, por ne do shohim punën tonë dhe besoj do dalim me rezultat pozitiv,”-u shpreh Flori Domi, futbollist i Kukësit.
Ne.k.//ReportTv.al