Kolegji i Posaçëm i Apelimit vendosi dje mospranimin e ankimit të ankueses Majlinda Salillari (Mançellari) duke shuar përfundimisht shpresat e ish- gjyqtares së Pogradecit për t'u rikthyer në sistemin e drejtësisë pas 23 vjetësh.
Ish gjyqtarja e Pogradecit ankimoi vendimin nr. 117, datë 17.09.2001, të Këshillit të Lartë të Drejtësisë, - zëvendësuar më pas nga Këshilli i Lartë Gjyqësor.
Gjyqtarja ishte shkarkuar në vitin 2001 nga KLD-ja e atëhershme, pasi ishte vënë nën hetim gjatë kohës së ish prokurorit të përgjithshëm Arben Rakipi për një vendimmarrje të dyshimtë në dosjen e njohur si ‘Martinelli”, trafikant italian makinash në rajon.
Gjyqtarja e çoi çështjen në Gjykatën e Lartë, ku kërkoi prishjen e vendimit të një institucioni që nuk ekzistonte më, siç ishte KLD-ja. Gjykata e Lartë shpalli moskompetencën dhe ia kaloi çështjen për shqyrtim Kolegjit të Posaçëm të Apelimit, që pas reformës në drejtësi, ka tagrin të shqyrtojë ankimet mbi vendimmarrjet e Këshillit të Lartë Gjyqësor dhe atij të Prokurorisë, sipas Juridiksionit Disiplinor të tij, krahas atij të rivlerësimit të gjyqtarëve dhe prokurorëve.
Njoftimi i Kolegjit të Apelimit:
Kolegji i Posaçëm i Apelimit , i përbërë nga Sokol Çomo kryetar, Albana Shtylla, Ina Rama, Mimoza Tasi, Natasha Mulaj, Rezarta Schuetz anëtarë, shpalli vendimin për çështjen (JD) nr. 2/2023, datë 30.03.2023, që i përket ankueses Majlinda Salillari (Mançellari) kundër vendimit të Këshillit të Lartë të Drejtësisë nr. 117, datë 17.09.2001, me subjekt të interesuar, Këshillin e Lartë Gjyqësor.
Në përfundim të gjykimit, Kolegji i Posaçëm i Apelimit, në mbështetje të neneve 131, pika 1, shkronja “f” dhe 134, pika 1, shkronja “i” e Kushtetutës, si dhe neneve 71 dhe 72 të ligjit nr. 8577, datë 10.02.2000, “Për organizimin dhe funksionimin e Gjykatës Kushtetuese të Republikës së Shqipërisë”, të ndryshuar, në mënyrë unanime, vendosi:
Mospranimin e ankimit të ankueses Majlinda Salillari (Mançellari), kundër vendimit nr. 117, datë 17.09.2001, të Këshillit të Lartë të Drejtësisë.
Ky vendim është përfundimtar dhe hyn në fuqi ditën e botimit në Fletoren Zyrtare.
Marrë më 15.12.2023
Shpallur më 15.01.2024
