Ligji i ri për sigurimin e detyrueshëm në sektorin e transportit ka parashikuar ndërhyrje rregullatore të Autoritetit të Mbikëqyrjes Financiare për përcaktimin e rregullave në lidhje me nivelin e komisioneve të ndërmjetësimit për produktet e sigurimit të detyrueshëm motorik.
Komisionet e ndërmjetësimit janë pagesat që shoqëritë e sigurimit u japin agjentëve të tyre ose brokerave (ndërmjetësve) në rastet e shitjes së policave (kontratave) të sigurimit.
Nga të dhënat teknike dhe financiare, të raportuara nga shoqëritë e sigurimit, rezulton se komisionet e ndërmjetësimit për sigurimin e detyrueshëm motorik (TPL, kufitare, Karton Jeshil) në vitet e fundit kanë qenë të larta, me një mesatare në nivel tregu prej afro 28%.
Projektrregullorja e publikuar për konsultim publik nga Autoriteti i Mbikëqyrjes Financiare përcakton se duke nisur nga 1 janari i vitit 2022, komisioni i ndërmjetësimit nuk mund të jetë më i lartë se 20% e primit të shkruar bruto për produktet e sigurimit të detyrueshëm. Kjo vlerë parashikohet të ulet në 18%, duke nisur nga 1 janari i vitit 2023.
Shoqërive të sigurimit u është lënë kohë deri në janar të vitit të ardhshëm të rishikojnë marrëveshjet aktuale me ndërmjetësit në lidhje me komisionet që ata përfitojnë për procedurat e marrjes në sigurim.
Kufizimi i komisioneve të ndërmjetësimit pritet të sjellë rritje të eficencës në shpenzimet e marrjes në sigurim, si edhe një administrim më të mirë të burimeve financiare të shoqërive të sigurimit./ Monitor
(Kliko këtu për komisionet e ndërmjetësimit)
