Ambasada amerikane në Kiev paralajmëron për një "sulm të mundshëm të rëndësishëm ajror", çka ka çuar në mbylljen e përkohshme të selisë diplomatike.
“Ambasada e Shteteve të Bashkuara në Kiev mori informacion specifik në lidhje me një sulm ajror të mundshëm të rëndësishëm më 20 nëntor”, tha ambasada në një deklaratë në faqen e saj të internetit. “Për më shumë kujdes, Ambasada do të mbyllet dhe punonjësit janë udhëzuar të strehohen në vend. “Ambasada e SHBA rekomandon që qytetarët amerikanë të jenë të përgatitur të strehohen menjëherë në rast se shpallet një paralajmërim për sulm ajror”, vijon mesazhi.
Të njëjtën gjë siç njoftoi agjencia ANSA, ka bërë edhe Italia. Ambasada e saj u njoftua se do të mbyllet gjithashtu për shkak të sinjaleve për një bombardim të mundshëm.
Paralajmërimi u bë një ditë pasi Ukraina përdori raketat amerikane ATACMS për të goditur në territorin rus, duke përfituar nga leja e sapo dhënë nga administrata në largim e Presidentit amerikan Joe Biden, në ditën e 1000-të të luftës.
Rusia e kishte paralajmëruar Perëndimin për muaj të tërë se nëse do ta lejonte Ukrainën të hidhte raketa amerikane, britanike dhe franceze thellë në Rusi, Moska do t'i konsideronte këto vende anëtare të NATO-s si të përfshira drejtpërdrejt në luftën në Ukrainë.
Presidenti rus Vladimir Putin tha në tetor se Moska do t'u përgjigjet sulmeve të Ukrainës me armë të prodhuara nga SHBA-ja në thellësi të Rusisë.
Presidenti rus nënshkroi të martën një doktrinë të rishikuar bërthamore, duke deklaruar se një sulm konvencional ndaj Rusisë nga çdo komb i mbështetur nga një fuqi bërthamore konsiderohet një sulm i përbashkët dhe mund të nxisë një përgjigje bërthamore.
