Rihapja e dosjes së 21 Janarit nga drejtësia, është i vetmi krim shtetëror për të cilin drejtësia është gjunjëzuar para politikës, duke e toleruar atë. Madje ky është i vetmi krim për të cilin nuk duhet hetuar vetëm Sali Berisha ai autor i vrasjeve, por dhe vet drejtësia që u gjunjëzua dhe nuk e thirri kurrë as për ta pyetur pse vrau.
Gjunjëzimi i drejtësisë para Sali Berishës më 21 janar dhe pas tij, është ndoshta historia më e shëmtuar në planet, se si prokurorë të shtetit, të vetëdijshëm për krimin, ulën kokën dhe injoruan zhdukjen e provave, sulmin politik mbi prokurorinë për të mos hetuar dhe më pas devijimin e pistës së vrasjeve dhe aktet politike për varrosjen e saj.
Shumica e prokurorëve të sotëm, përfshi dhe këta të SPAK në hallka të ndryshme të kësaj historie të shëmtuar, kanë qenë pjesë e saj dhe tani janë në provë të shikojmë nëse ata janë nënshtruar nga frika apo kanë qenë pjesë e vetëdijshme e një loje për mbulimin e atij krimi shtetëror.
Sa herë që tentohej të hapej kjo çështje, gjithmonë sabotohej ose anashkalohej në detaje të parëndësishme, vetëm që të mos merrej në pyetje Sali Berisha dhe të mos bëhej një hetim i thelluar i saj.
Po të mos ishte vendimi i Gjykatës së Strasburgut që detyroi Gjykatën e Lartë të urdhëronte hapjen e saj, nuk do të ishte hapur kurrë.
Madje dhe Gjykata e Lartë, ka qenë nën presion nga segmente të drejtësisë së re, përfshi dhe prokurorë të SPAK në mënyrë informale, që çështja të mos u kalonte atyre, që është një sinjal se dhe brenda drejtësisë së re ende dikush heziton ta marrë në dorë këtë patate të nxehtë.
21 Janari është një çështje shumë e lehtë për t’u hetuar. Vrasjet janë bërë live para kamerave, dhe detyra e prokurorëve ishte vetëm të mblidhnin fakte dhe të hetonin çështjen.
Siç e përshkruan vendimi i Gjykatës së Strasburgut, autoritet dështuan të kryejnë hetim për të zbardhur të vërtetën, si në fazat e hershme të hetimit, dhe në përgjegjësinë që kanë persona me pushtet në kthesën që morën ngjarjet, deri tek vrasjet.
Siç thekson vendimi, nevoja për të mbrojtur godinën e Kryeministrisë nuk legjitimon vrasjen e protestuesve, pasi dhe vet ligji jonë nuk lejon përdorimin e zjarrit vdekjeprurës për mbrojtjen e kësaj prone.
Drejtësia jonë dështoi në marrjen e provave. Dy prokurorët që shkuan në vendngjarje, nuk u lejuan të futeshin në oborrin e Kryeministrisë dhe para syve të tyre fshiheshin me fshesë plumbat në oborr dhe ndërrohej porta e Kryeministrisë.
Deri në orën 7 mëngjesit të datës 22 janar ata nuk u lejuan të hyjnë në oborr të Kryeministrisë dhe godinë, të merrnin serverin e kamerave, dhe siç doli më vonë nga ekspertiza amerikane në orën 01: 30 të natës kompjuteri që kishte serverin e kamerave është ndërruar duke u zhdukur.
Me kriteret që SPAK përdor sot për fshehje provash, me këtë provë të zhdukur duhet të arrestohej dhe pastruesja e Kryeministrisë e jo më Sali Berisha.
Më 22 mars, me urdhër të Sali Berishës dhe deklaratës publike të tij, nuk u lejua dorëzimi i gjashtë gardistëve të grupit të zjarrit të dyshuar si autorë të vrasjeve, të cilët mbaheshin peng nga vet qeveria në godinën e saj.
Vet Sali Berisha u angazhua publikisht për ndryshimin e pistës së vrasjeve. Në orën 19: 30 në datën 21 Janar akuzoi opozitën se i vrau ajo protestuesit, kurse të nesërmen në mëngjes mori përsipër vrasjet duke shpikur një grusht shteti, ku bënin pjesë presidenti i Republikës, kryeprokurorja Ina Rama, katër gazetarë dhe kryetari i SHISH.
Kundër tyre ngriti një komision hetimor, për të bllokuar hetimet e prokurorisë dhe më tej çështja degradoi në një gjyq formal, ndaj Ndrea Prendit, komandant Garde dhe Agim Llupos, një gardist vrasës, të cilët në sallë dukeshin si prokurorë, kurse gjyqtarët si të akuzuar, pasi salla ishte e mbushur me gardistë dhe militantë që terrorizonin gjykatën.
13 vite më vonë Sali Berisha ende nuk është pyetur, gjyqi nuk është bërë kurrë dhe po të mos ishte këmbëngulja e familjes Nika dhe fitoja e tyre në Strasburg, sot do të ishin të qetë dhe vrasësit e 21 Janarit, dhe ajo pjesë e drejtësisë që ende ka bezdi ta hapë atë çështje.
Tani është koha të shikojmë nëse procesi do të jetë një farsë e imponuar nga vendimi i Strasburgut, apo një vullnet i drejtësisë së re, pasi ky është një gjyq ku nuk ka faj vetëm Sali Berisha, por dhe drejtësia e gjunjëzuar para tij.
M.Q./ReportTv.alKomente
![](https://www.report-tv.al/template/img/antipiracynote.jpg)
O Mero Baze mos haro se dhe ti dikur ke qen miku i Sali Bajgēs. Ke qen te grupi tij e ti tani shkruan pa pushim. Qē tē gjitha çfar thua jan reale po mos haro Sali Bajga ka qen ish miku jot.
Përgjigjupa u vene drejtesi mbi keto vrasje qytetaresh te pafajshem shtet serioz nuk besoj se do jemi
Përgjigju