Sjellja gjoja e çuditur e mbështetësve të Sali Berishës pas vendimit të Departamentit të Shtetit të SHBA, ka kërcitur prej ditësh me realitetin në vend. Si perceptim, apo edhe si zhvillim.
Si një argument që nxjerrin “partizanët e Berishës” është pse po bëhet sot?
Por që në fakt, duket se ka një vijimësi ngjarjesh, që kush i lë pas dore, së paku ka kujtesë të shkurtër.
Sali Berisha, përveç aktivitetit që citohet në vendimin e DASH si kryeministër, pra me abuzimin dhe korrupsionin, ka damkën e fortë të minimit të demokracisë.
E nëse thjesht shfletojmë eventet që kanë ndodhur në vend, ndriçohemi me ngjarjet dhe lajmet.
Sali Berisha, më 21 prill të vitit 2016, pra ende pa u miratuar reforma në drejtësi, por që po diskutohej fort, bëri thirrje që “shqiptarët të armatosen”.
“Ju bëj thirrje qytetarëve që të armatosen për të mbrojtur veten dhe sigurinë e tyre.
Nëse ju kërcënoni me banda opozitën, qytetarët janë të gatshëm t’ju kundërshtojnë me armë e të mos gjeni vrimë ku të futeni.
Armatosen amerikanët, armatosen të gjithë qytetarët.
Me këtë organizatë kriminale në pushtet nuk ka siguri, rend dhe qetësi”, tha Berisha në atë kohë.
Jemi përpara korrikut të vitit 2016. E pas kësaj deklarate, një grup deputetësh socialistë bënë padi në Prokurorinë e Përgjithshme ndaj Sali Berishës, së cilës, kryeprokurori i përgjithshëm Adriatik Llalla e refuzoi.
Kësaj padie, Llalla ju përgjigj zyrtarisht se Berisha nuk mban përgjegjësi për atë ç´ka deklaron.
Ja përgjigja e Prokurorisë së Përgjithshme:
“Prokuroria e Përgjithshme ka vendosur mosfillimin e procedimit penal ndaj deputetit Sali Berisha, mbi bazën e kallëzimit të një grupi deputetësh, për veprat penale të parashikuara nga nenet 222, 223 dhe 267 të Kodit Penal.
Më datë 29.04.2016, disa deputetë të Kuvendit të Shqipërisë kanë depozituar në Prokurorinë e Përgjithshme, kallëzim penal ndaj deputetit Sali Berisha, për kryerjen e elementëve të veprave penale të mëposhtme:
-“Thirrjet për armatosje, ose marrja pa të drejtë e komandës”, parashikuar nga neni 222 i Kodit Penal;
-“Thirrjet publike për veprime të dhunshme”, parashikuar nga neni 223 i Kodit Penal; dhe
-“Përhapja e informatave të rreme që ngjallin panik”, parashikuar nga neni 267 i Kodit Penal.
Nga përmbajtja e kallëzimit penal, të paraqitur nga grupi prej 11 deputetësh të Kuvendit të Shqipërisë, rezulton ndër të tjera të jetë pretenduar se, në seancën plenare të Kuvendit të Shqipërisë të datës 21.04.2016, deputeti Sali Berisha, ka konsumuar tre veprat penale të sipërcituara, kur ka deklaruar se:
“… Unë kam një kërkesë për shqiptarët sot: ju bëj thirrje qytetarëve shqiptarë, për sigurinë e tyre, të armatosen, të sigurojnë armë…”.
“… Ju bëj thirrje, Ju bëj thirrje (…) Po, po të armatosen, se armatosen amerikanët.
Të armatosen të gjithë qytetarët që duan të mbrojnë veten e tyre.”.
“Nëse ju o organizatë kriminale, mendoni të terrorizoni opozitën dhe qytetarët me bandat tuaja, ju garantoj se opozita dhe qytetarët janë të gatshëm t’jua kthejnë ju me të njëjtat mjete…”.
“Dhe tani, sapo përmenda fjalën “armë”, ju ngritë nga frika, ju ka hyrë frika deri në palcë”.
Prokuroria e Përgjithshme kreu verifikimet mbi pretendimet e kallëzuesve dhe vendosi mosfillimin e procedimit penal ndaj deputetit të kallëzuar, duke argumentuar në mënyrë të përmbledhur, si më poshtë:
“- Deklaratat e deputet të Kuvendit të Shqipërisë, nga foltorja e sallës plenare, janë bërë në funksion të veprimtarisë parlamentare dhe në përmbushje të fjalës së lirë të opozitës parlamentare;
– Deklarimet e bëra prej të kallëzuarit, në cilësinë e deputetit, ndonëse të kryera në ambjentet e Kuvendit, gjatë një veprimtarie parlamentare dhe të lidhura me çështjet në debat parlamentar, nuk përmbushin elementët e ndonjë vepre penale.
– Prokuroria arrin në përfundimin se, fjalimi i të kallëzuarit, deputetit Sali Berisha në seancën plenare të datës 21.04.2016, është bërë në funksion të veprimtarisë dhe lirisë parlamentare.
Fjala e mbajtur prej tij konsiderohet se janë pjesë e lirisë parlamentare të fjalës, mendimit dhe qëndrimeve, në ushtrim të mandatit të deputetit të garantuar dhe parashikuar nga neni 73 i Kushtetutës.
– Shprehjet e përdorura prej tij dhe të konsideruara nga kallëzuesit si të tilla që përmbajnë elementët e veprave penale të referuara, nuk mund të vlerësohen të shkëputura nga konteksi i fjalimit të mbajtur prej të kallëzuarit, deputetit Sali Berisha.
– Prokuroria çmon se nuk mund të konsiderohet si vepër penale shfaqja e mendimit e bërë për armatosjen e popullsisë për të mbrojtur veten, familjen, pronën etj, në kushtet kur në vlerësimin e deputetit të kallëzuar, shteti i ka lënë të lirë kriminelët dhe në funksion të saj, sugjeron përgatitjen e një ligji të tillë që justifikon pajisjen e tyre me armë, duke marrë si shembull SH.B.A-të, të cilat e kanë të lejuar mbajtjen e armëve të zjarrit.
– Pikëpamja, sipas të cilës shteti mund të lejojë pajisjen me armë e popullsisë në mënyrë ligjore, është një këndvështrim politik, i cili nuk është i ri, pasi ka eksperienca të tilla në vende të ndryshme të botës, përfshi këtu edhe SH.B.A-në, por kjo nuk do të thotë që ata politikanë të cilët e përqafojnë këtë kauzë duhet të mbajnë përgjegjësi ligjore.
Në bazë të këtyre argumentave, të paraqitura në mënyrë të përmbledhur, Prokuroria e Përgjithshme vendosi mosfillimin e procedimit penal ndaj deputetit Sali Berisha”.
Por ky qëndrim i Berishës ishte vetëm njëri nga më të rëndat.
Në vitin 2019 Partia Demokratike mori vendimin për djegien e mandateve dhe bojkotimin e zgjedhjeve lokale të 30 qershorit.
Mjaft panelistë nuk rreshtin së përsërituri se vendimin e mori Lulzim Basha dhe nuk u influencua nga Sali Berisha.
Ideja është dhënë pikërisht nga Sali Berisha dy vjet përpara se të merrej vendimi fatal, që shkatërroi përfundimisht marrëdhëniet e Partisë Demokratike me Perëndimin.
Në dhjetorin e vitit 2017, pra një vit më pas kur hodhi paralajmërimin e armatosjes që nuk ja vari kush, Sali Berisha foli për djegien e mandateve parlamentare.
Berisha në atë kohë përdori termin asgjesim. Një nga portalet pro opozitës i ka dhënë jehonë këtij paralajmërimi (https://lapsi.al/2017/12/19/hilja-e-berishes-me-propozimin-per-djegjen-e-mandateve/)
Berisha më 19 dhjetor të vitit 2017 foli për “asgjësim mandatesh”, pra 2 muaj përpara vendimit final.
Kush e ka marrë vendimin atëherë: Berisha apo Basha? Natyrisht që Basha dhjesht ka firmosur, por idenë, inspirimin e në fund vulën e ka vendosur Sali Berisha.
Kjo është e qartë: e shikojnë shqiptarët dhe ndërkombëtarët. Nuk e shikojnë vetëm ata që janë të detyruar të mbrojnë doktorin në publik, por kjo nuk se është problem publik, është thjeshtë problem i marrëdhënieve kontraktuale të tyre…/ Gazeta Tema
