Juventusi është mundur në ndeshjen e parë të fazës së 1/8 të Champions League. Porto ka fituar në stadiumin “Do Dragao” 2-1 ndaj italianëve duke hedhur një hap të rëndësishëm drejt kualifikimit për në çerekfinale megjithëse çdo gjë do të vendoset në duelin e kthimit.Pas vetëm një minute lojë Porto shënoi me Taremi pas një gabimi të Bentancur ndërsa goli i dytë erdhi në fillimin e pjesës së dytë nga Marega.
Në lojë Juventusin e mbajti goli i Chiesa shënuar në minutën e 83-të. Juventusi nëse do të vazhdojë në Champions duhet të përmbysë Porton në ndeshjen e kthimit në Torino.
Surprizën e bëri Dortmund në ndeshjen tjetër të mbrëmjes për fazën e 1/8 zhvilluar në “Ramon Sanchez Pizjuan”. Dortmundi mposhti 3-2 Sevillan duke prenotuar kalimin në fazën tjetër. Suso kaloi Sevillan në avantazh por gjermanët përmbysën gjithçka që në pjesën e parë me golin e Dahoud dhe me një dygolësh fantastik të Erling Haaland. Sevilla ngushtoi diferencën me de Jong në fundin e takimit dhe mbetet në lojë për kualifikimin./Përgatiti Andi Kapxhiu
