Për ministrin e Shtetit të Rindërtimit, ish-ministër i Financave dhe Ekonomisë, Arben Ahmetaj programi i Partisë Demokratike është një 'program futja kot'. Teksa 'skanon' premtimet kryesore të demokratëve Ahmetaj thotë se taksa e sheshtë është varfëruese ndërkohë që premtimin për uljen e kontributit të sigurimeve shoqërore nga 24,5% në 18% ai thotë se është një gënjeshtër e madhe dhe nëse realizohej do “t’i lente shqiptarët pa pensione".
Ditën e djeshme PD prezantoi programin ekonomik me të cilin do u drejtohen shqiptarëve në zgjedhjet e 25 prillit. Qëllimi, tha kryedemokrati Lulzim Basha në prezantimin e tij, është rimëkëmbja e ekonomisë. Disa nga pikat kryesore të këtij programit, për të cilin Basha tha se janë dashur 2 vite për ta hartuar, është hapja e 110 mijë vendeve të punës, rritja e pagës minimale nga 30 mijë lekë në 36 mijë lekë, (edhe pse më herët kishte premtuar se do e bënte 400 euro), 3 mijë lekë në muaj për bebet për 5 vitet e para të jetës.
Lidhur me mendimin e ish-ministrit të Financave Arben Ahmetaj, ka reaguar deputetja Jorida Tabaku. Ajo përmes një postimi në rrjetin e saj social Facebook, ka thënë se Shqipëria do të fitojë me taksën e sheshtë pasi shqiptarët do të taksohen në një mënyrë të ndershme dhe të barabartë dhe do të punësohet 110 mijë persona.
Postimi i plotë i Ahmetaj
Taksë e sheshtë varfëruese apo taksim i drejtë progresiv?
Dyfishim i të ardhurave për frymë...pa afat. Si projekti i tramit.... në kalenda...
Ulja e kontributit të sigurimeve shoqërore – gënjeshtër? padituri?..apo një skemë për t’i lënë shqiptarët pa pension.
Pra, një program “futja kot, se dhe po na besuan, fajin e kanë vetë”
Ja çfarë na thanë në pseudo-programin e tyre:
1. Do vendosin taksë të sheshtë 9% mbi të ardhurat nga paga – pra, rritje takse për të gjitha pagat deri në 100 mijë lekë/muaj; taksë varfëruese për 94.5% të të punësuarve; ulje taksash për vetëm 5.5% të tyre!
Një qytetar me pagë 35 mijë lekë/muaj, paguan tatim:
· 1% - me taksën e drejte progresive
· 9% - me taksën e sheshtë. I rritet tatimi mbi të ardhurat me 31 mijë lekë më shumë në vit; praktikisht shteti i merr nga xhepi një pagë mujore në vit.
Një qytetar me pagë deri 35-40 mijë lekë/muaj, paguan tatim:
· 2.6% - me taksën progresive
· 9% - me taksën e sheshtë. I rritet tatimi 280 USD më shumë në vit.
Po kë lehtëson taksa e sheshtë 9%?
Një qytetar me pagë të lartë 200-300 mijë lekë në muaj, paguan:
· 13.6% tatim - me taksën progresive
· 9% tatim - me taksën e sheshtë. I ulet tatimi me 1850 USD/vit.
E dini sa i kursen taksa e sheshtë 9% një bankieri, drejtuesi koorporate, apo punonjësi me pagë 300-400 mijë lekë/muaj? 11.600 USD në vit. Me taksën varfëruese të sheshtë 9%, maja e piramidës së pagave, përfiton në total ulje taksash 150 milionë lekë/muaj.
2. Do të ulin tatimin mbi të ardhurat e kompanive nga 15% ne 9% - pra, 10 mijë biznese të mëdha të përfitojnë në kurriz të 100 mijë bizneseve të vegjël!
Me taksën e sheshtë 9%, i kursejnë 10 mijë kompanive të mëdha rreth 14.5 miliardë lekë.
Me taksën e drejtë progresive, në 8 vitet e fundit, taksat e biznesit të madh janë rritur 460% krahasuar me 2013.
3. Vendosin tatimi 0,5% të xhiros për bizneset e vogla – 20 milionë dollarë në kurriz të biznesit të vogël, 100 mijë biznese që sot paguajnë 0 TAKSA!
4. Ulja e taksës se qarkullimit me 20 lekë nga çmimi i karburanteve dhe 4 lekë TVSH, 24 lekë/litër - nëse llogarisim që konsumi vjetor i karburanteve është rreth 480 mijë ton, efekti në buxhet i kësaj mase do të ishte -14,4 miliardë lekë, ose një rënie me 5% e të ardhurave vjetore nga Tatimet dhe Doganat.
5. Ulja e kontributit të sigurimeve shoqërore nga 24,5% në 18% - Të ardhurat vjetore nga kontributet e sigurimeve shoqërore do të uleshin në 64 miliardë lekë, ose 23 miliardë lekë më pak nga sa arkëtohen sot. Kjo është skema “t’i lemë shqiptarët pa pensione”!
Deputetja, Jorida Tabaku ka reaguar në lidhje me mendimin e ish-ministrit të Financave Arben Ahmetaj mbi programin ekonomik të PD-së.
Ajo përmes një postimi në rrjetin e saj social Facebook, ka thënë se Shqipëria do të fitojë me taksën e sheshtë pasi shqiptarët do të taksohen në një mënyrë të ndershme dhe të barabartë dhe do të punësohen 110 mijë persona.
“Shqipëria fiton me taksën e sheshtë sepse investimet e huaja direkte do të rriten, Shqipëria sot nuk ka më investime të huaja. Por ajo do të fitojë nga rritja e tyre përmes taksës së sheshtë 9%.”, shkruan ajo.
Sipas Tabakut, Shqipëria fiton kur shqiptarët taksohen në mënyrë të barabartë, fiton kur shtresa e mesme që sot diskriminohet do të mund të sigurojë më shumë të ardhura përmes taksës së sheshtë.
‘Taksa e sheshtë do të rrisë formalitetin, do të eliminojë favorizimet dhe do të nxisë ekonominë", shkruan në fund të postimit ajo.
