Kryetarja e Bashkisë Shkodër, Voltana Ademi ka reaguar për dhunën e ushtruar në protestën e Shkodrës, që në fakt duhet të ishte vetëm një marshim paqësor. Ademi, e cila ishte prezente vetëm 10 minutat e para në protestë, tha se ajo nuk përkrah asnjë lloj dhune dhe aq më pak shkatërrimin që iu bë selisë së Partisë Socialiste.
Ademi shkruan se kur dhuna nisi ka qenë vetë ajo që ka lajmëruar policën Shkodër, ndërsa shprehet se PD nuk ka nxitur kurrë urrejtje politike as në kohërat më të errëta dhe nuk nxit as dhunën sot.
"Si qytetarja e parë e Shkodrës kisha përgjegjësinë të isha sot me shkodranët e revoltuar nga arbitrariteti që çon deri në vrasje, e shtetit policor të ndërtuar nga Edi Rama në këto 7 vjet.
Ne bëmë detyrën tonë ndaj demokracisë dhe lirisë në një marshim paqësor. Thyerja e selisë së Partisë Socialiste nuk është ajo që ne duam dhe ajo që ne shkodranët mbështesim.
Ne nuk kemi nxitur kurrë urrejtje politike as në kohërat më të errëta dhe persekutimin më të egër, nuk nxisim as sot as dhunën, as urrejtjen mes vendit.
Qytetarët duhet ta dinë se kur disa të rinj, të panjohur dhe të pambështetur nga protestuesit e tjerë, u drejtuan nga selia e PS, njoftova autoritetet më të larta të Policisë në Shkodër. Policia ndenji me duar në xhepa, duke parë dhunimin e selisë, pa bërë asnjë veprim.
Të rinjtë dhe qytetarët nuk duhet të bien pre e asnjë provokimi kriminal, siç ka ndodhur në Tiranë nga regjimi i Edi Ramës dhe siç po ndodh sot në Shkodër. E drejta për të protestuar është legjitime dhe ajo duhet të ushtrohet pa pengesa dhe tejkalime", shkruan Ademi në facebook.
Lajmi kryesor:
Dhunë në Shkodër/ Të miturit në krye të 'rebelimit', shkatërrojnë selinë e PS! Mbërrijnë Balla dhe Beqaj: E organizoi PD-LSI, Monika të heqë dorë nga pagesat për minorenët
