Në vitet 2021 dhe 2022 Shqipëria pret një rimëkëmbje ekonomike pas tronditjes nga pandemia e COVID.
Ky është qëndrimi i Guvernatorit të Bankës së Shqipërisë, Gent Sejko dhe misionit të FMN-së gjatë një bisedë që patën online. Gjatë bisedës u nënvizua fakti se ritmi i rimëkëmbjes ekonomike do të varet nga shpejtësia e vaksinimit.
Sejko tha se sektori bankar në vend është i mirëkapitalizuar, solid dhe me tregues të mirë të likuiditetit e të shëndetit financiar. Ai nënvizoi se ky sektor ka ndihmuar në zbutjen e pasojave të goditjes së pandemisë, duke marrë përsipër një pjesë të barrës financiare të goditjes, si dhe duke ruajtur në të njëjtën kohë të gjithë treguesit në parametra të shëndetshëm.
Nga ana e tyre përfaqësuesit e FMN vlerësuan se qëndrimi i politikës monetare ka qenë dhe mbetet i përshtatshëm, duke ofruar stimujt e nevojshëm për nxitjen e rritjes ekonomike.
K.T.//ReportTv.al