Shtëpia e Bardhë po përgatit një urdhër ekzekutiv mbi dhunën politike dhe gjuhën e urrejtjes, tha të mërkurën një zyrtar i administratës Trump, ndërsa dhjetëra organizata jofitimprurëse me prirje të majta hodhën poshtë atë që e përshkruan si përpjekje për të minuar punën e tyre.
Administrata ka intensifikuar shqyrtimin e organizatave liberale pas vrasjes së aktivistit konservator Charlie Kirk, një aleat i fortë i Trump.
Presidenti Donald Trump dhe republikanë të tjerë kanë akuzuar grupet liberale se po kontribuojnë në rritjen e gjuhës së urrejtjes dhe intolerancës, ndërsa kanë refuzuar të kritikojnë grupet dhe aktivistët me prirje të djathta që kanë kontribuar në përçarjet e vendit.
Detajet specifike rreth planit të administratës, janë ende duke u përpunuar nga këshilltarët kryesorë të Trump, përfshirë Stephen Miller, zëvendësshefin e stafit të Shtëpisë së Bardhë, i cili ka ndihmuar në udhëheqjen e reagimit ndaj vrasjes së Kirk, sipas zyrtarit.
Shtëpia e Bardhë akuzon organizatat e krahut të majtë për nxitje të trazirave dhe sulme ndaj oficerëve të zbatimit të ligjit dhe është zotuar të kërkojë atë që e përshkruan si një rrjet grupesh që nxisin dhunën në komunitetet amerikane.
Kritikët thonë se fokusi i Trump te organizatat e krahut të majtë injoron faktin se në ditën e tij të parë në detyrë në janar, ai fali mbështetësit e dënuar për sulmin në Kapitolin e SHBA-së më 6 janar 2021, përfshirë disa persona që kishin sulmuar oficerët e zbatimit të ligjit.
Grupet me prirje të majta kanë kundërshtuar përpjekjet e reja të Shtëpisë së Bardhë.
Të mërkurën, më shumë se 120 objektiva të mundshëm të administratës publikuan një letër duke hedhur poshtë atë që ata e quajtën një shtytje për të shfrytëzuar dhunën politike për të keqkarakterizuar punën e tyre bamirëse.
Nënshkruesit e letrës përfshijnë fondacione me prirje të majta që janë emëruar publikisht nga administrata si objektiva të mundshme, të tilla si Fondacioni Ford, Fondacionet e Shoqërisë së Hapur dhe Fondacioni Tides, por edhe organizata jofitimprurëse më të njohura si Fondacioni Bush dhe Fondacioni Carnegie.
“Ne hedhim poshtë përpjekjet për të shfrytëzuar dhunën politike për të keqkarakterizuar punën tonë të mirë ose për të kufizuar liritë tona themelore, si liria e fjalës dhe liria për të dhënë”, thuhet në letër.
Trump ka sugjeruar që Prokurorja e Përgjithshme Pam Bondi mund të përdorë statutin federal për të ndjekur penalisht grupet që ai pretendon se financojnë dhunën e krahut të majtë. Ai ka përmendur gjithashtu përcaktimin e disa grupeve të majta si organizata terroriste.
Nëse administrata i ndjek këto plane, kjo do të shënonte përshkallëzimin e fundit në një fushatë më të gjerë nga administrata Trump për të sfiduar dhe degraduar institucionet me të cilat nuk është dakord.
Si pjesë e ofensivës së tij kundër institucioneve liberale, Trump ka mbajtur fondet federale nga Universiteti i Harvardit, Universiteti i Kolumbias dhe shkolla të tjera duke argumentuar se ato promovojnë një ideologji liberale, inkurajojnë mospajtimin politik dhe mbështesin antisemitizmin./Reuters
Komente
