Kryetari i Kuvendit Gramoz Ruçi i ka dërguar ftesë zyrtare Partisë Demokratike për të marrë pjesë në mbledhjen e parë të komisionit të posaçëm parlamentar për reformën zgjedhore, që tashmë drejtohet nga dy bashkëkryetarë, Damian Gjiknuri nga Partia Socialiste, dhe Rudina Hajdari nga grupi parlamentar demokrat i opozitës së re.
Ne letrën që Kuvendi ka dërguar përmes sekretarit të Përgjithshëm të këtij institucioni, Genci Gjonçaj, thuhet se vëzhguesi i Partisë Demokratike, partisë më të madhe të opozitës sipas rezultatit të zgjedhjeve të vitit 2017, do të ketë të drejta të plota që u përkasin bashkëkryetarëve të komisionit.
Kuvendi i bën thirrje PD-së, në letrën drejtuar sekretarit të përgjithshëm të Partisë, Gazment Bardhit, që të caktojë një përfaqësues për të marrë pjesë në mbledhjen e komisionit, e cila është thirrur nga Gjiknuri dhe Hajdari, për më 7 maj.
Deri më tani, opozita nuk i është përgjigjur kësaj oferte opozitare për tu bërë bashkë tek tryeze e reformës zgjedhore.
