Hetuesit e Policisë së Kavajës e kanë akoma të paqartë arsyen e nisjes së debatit mes Astrit Pukamekës dhe dy të afërmve të ish-bashkëshortes, ngjarje që kaloi deri në absurd në tentativën për t’i djegur pasi i spërkati me naftë. Pas kësaj, Pukameka nisi një zinxhir të gjatë krimesh që prodhuan dy të plagosur. Ai nuk tregoi arsyet e konfliktit gjatë marrjes në pyetje, ndërsa ka shfaqur luhatje që bënë hetuesit të dyshojnë mbi shëndetin e tij mendor. Për këtë arsye pritet ekzaminim i plotë i tij shëndetësor gjatë fazës së hetimit. Grupi hetimor dyshon se konflikti fillestar nisi si pasojë e një konflikti të çastit, ndërkohë që është vërtetuar se autori nuk ka qenë i dehur.
Por, çfarë ndodhi të mërkurën në Kavajë?
Fillimisht Astrit Pukameka u konfliktua me dy të afërmit e ish-bashkëshortes në rrugën dytësore në afërsi të mbikalimit të Kavajës. 45-vjeçari i spërkati me naftë të dy, duke tentuar t’i djegë, po nuk ia doli dot.
Nga aty, Pukameka është zhvendosur në një dyqan në afërsi dhe u konfliktua me shitësin e Bardhyl Petja. Gjatë konfliktit Petjan e qëlloi me thikë dhe doli përjashta.
Në afërsi të dyqanit, nën kërcënimin e të njëjtës thikë që plagosi shitësin, Pukameka mori peng taksistin Arjan Shau dhe e urdhëroi të nisej në drejtim të Rrogozhinës. Sapo arritën në afërsi të fshatit Lekaj, Arjan Shau tentoi të devijojë makinën duke u future në parkimin e një pike karburanti. Në këtë moment 45-vjeçari e ka qëlluar me thikë duke e lënë Shaun të plagosur.
Pasi plagosjes së dytë në pak minuta, Pukameka doli nga makina, u afrua tek vendqëndrimi i punonjësit të karburantit dhe i mori xhiron ditore të parave, shumë prej 120.000 lekësh. Pas mbërritjes së shërbimeve të policisë, Astrit Pukameka kërcënoi se do të digjte karburantin, por është ndërhyrja e efektivëve ka qenë e shpejt dhe u neutralizua.
45-vjeçari, në një hark kohor shumë të shkurtër është autor i disa ngjarjeve të rënda dhe akuzohet për gjashtë vepra penale, kanosja, plagosje të rëndë me dashje, plagosje të lehtë me dashje, vjedhje me dhunë, heqje të paligjshme të lirisë dhe prodhim, mbajtje, blerje apo shitje pa leje të armëve të ftohta. Prokuroria e Kavajës pritet të kërkoj caktimin e masës “arrest në burg” për 45-vjeçarin.
Report Tv ka siguruar videon nga momenti kur Astrit Pukameka kërcënon se do të djeg karburantin, por është ndërhyrja e efektivëve ka qenë e shpejt dhe u neutralizua. Në pamje duket edhe momenti kur ai është vënë në prangat e Uniformave të Policisë.
