Një lajm i bujshëm vjen nga Anglia për mbrojtësin e Kombëtares shqiptare, Elseid Hysaj, teksa shkruhet se trajneri i Manchester United, Jose Mourinho, e ka ndarë mendjen për lojtarin që do të mbulojë krahun e djathtë të mbrojtjes sezonin e ardhshëm.
Ai është shkodrani Elseid Hysaj, lojtari që luan me Napolin. “The Sun” e bën të kryer, duke shkruar se trajneri portugez është gati të paguajë klauzolën e 50 milionë eurove për ta marrë Hysajn nga Napoli në merkaton e verës.
Mateo Darmian pritet të kalojë te Juventus dhe nevoja për një mbrojtës të djathtë te Manchester bëhet emergjente. Ky pozicion shihet me përparësi nga trajneri Mourinho, i cili kërkon ta mbyllë sa më shpejt me blerjen e Hysajt.
Prestigjiozja angleze shkruan se 24-vjeçari shkodran është nga më të mirët në Europë në rolin e tij dhe se kërkohet edhe nga klube të tjera të mëdha.
(Shkrimi i "The Sun" për futbollistin Elseid Hysaj)