Programacion

E Mërkurë
12
Maj
E Enjte
13
Maj
E Premte
14
Maj
E Shtunë
15
Maj
E Diel
16
Maj
E Hënë
17
Maj
E Martë
18
Maj
E Mërkurë
19
Maj
E Enjte
20
Maj
E Premte
21
Maj
E Shtunë
22
Maj
E Diel
23
Maj
E Hënë
24
Maj
E Martë
25
Maj

Yuri Kim

Politikë

Reforma në drejtësi/ Yuri Kim: Jetike dhe i vetmi mjet për një të ardhme të sigurt! Drejtësia e re po jep rezultate

9 Prill, 19:46| Përditesimi: 9 Prill, 20:39

Ambasadorja e SHBA-së, Yuri Kim ka theksuar edhe një herë se SHBA e mbështet plotësisht reformën në drejtësi në Shqipëri dhe aspiratat e anëtarësimit të saj në BE. Duke e cilësuar këtë reformë si jetike për të ekonominë, demokracinë dhe zhvillimin e vendit, ambasadorja Yuri Kim shprehet se kjo reformë është i vetmi mjet për një të ardhme të sigurt për vendin tonë dhe integrimin e tij në BE.

Kim theksoi se investimet e SHBA në sektorin e drejtësisë po tregojnë rezultate dhe se SHBA është e angazhuar për të siguruar që sistemi gjyqësor shqiptar të jetë tërësisht i plotësuar dhe funksional. Sipas ambasadores Kim, reforma në drejtësi është thelbësore për suksesin në ndërtimin e mundësive për popullin shqiptar dhe integrimin në BE.   

"Më lejoni të jem e qartë: SHBA e mbështet plotësisht reformën në drejtësi të Shqipërisë dhe aspiratat e anëtarësimit të saj në BE. Ne jemi me ju krah për krah. Unë jam angazhuar personalisht si përfaqësuese e Presidentit të Shteteve të Bashkuara për të bërë gjithçka që mundem për të promovuar këtë reformë si një mjet për të arritur një të ardhme më të drejtë, më demokratike dhe më të sigurt për shqiptarët. Projekti “Drejtësi për të gjithë” ka qenë njëri prej angazhimeve të shumta të SHBA-ve për të mbështetur reformën në drejtësi të Shqipërisë. Mbështetja jonë do të vazhdojë. Unë jam e inkurajuar nga mënyra sesi gjykatat në të gjithë vendin kanë përmirësuar performancën e tyre të përgjithshme, se si Gjykata e Lartë u organizua për të adresuar çështjet e saj në rritje dhe se Shkolla e Magjistraturës krijoi një program për edukimin e brezave të ardhshëm të profesionistëve ligjorë.

Reforma në drejtësi nuk është e shpejtë, nuk është e lehtë dhe as nuk është e përsosur. Ky është një udhëtim që do kohë dhe përpjekje të qëndrueshme. Nuk ka asnjë alternativë: reforma në drejtësi është jetike për suksesin e Shqipërisë si komb, jetike për suksesin e saj si një ekonomi dhe thelbësore për suksesin e saj si ndërtimi i mundësive për popullsinë e saj të ndritshme, energjike dhe punëtore. Ajo është një shtyllë e rëndësishme për të realizuar të ardhmen e saj në Evropë, si një anëtar i familjes së demokracive evropiane. Si me çdo ndërmarrje gjithëpërfshirëse, e vetmja mënyrë për të arritur atje ku po shkojmë është një hap në një herë, një këmbë përpara tjetrës", tha Kim

Ambasadorja Kim tha se SHBA ka të njëjtat pritshmëri me popullin shqiptar që njerëzit që janë në karrigen e gjykatësit ose që përfaqësojnë prokurorinë të jenë gra dhe burra me integritet dhe mirëbesim, dhe që i shërbejnë shtetit të së drejtës, jo interesave kriminale. Këto deklarata Yuri Kim i bëri sot gjatë Aktivitetit të USAID “Drejtësi për të gjithë”, i cili shënoi përparimet në reformën në drejtësi.

Ne jemi të përkushtuar të punojmë me ju për të siguruar që sistemi gjyqësor shqiptar të jetë tërësisht i plotësuar dhe funksional. Duam atë që do populli shqiptar: që njerëzit që janë në karrigen e gjykatësit ose që përfaqësojnë prokurorinë të jenë gra dhe burra me integritet dhe mirëbesim, dhe që i shërbejnë popullit dhe i shërbejnë shtetit të së drejtës – jo interesave ngushta ose kriminale. ”, tha Kim

Reforma në Drejtësi ka qenë kryefjalë e ndërkombëtarëve të cilët kanë shprehur hapur mbështetjen e tyre. Kim ka qenë shumë AKTIVE me takime me krerët e institucioneve të reja të drejtësisë, ku ka këmbëngulur se kjo reformë po jep rezultatet e para, duke nisur që nga puna e SPAK me operacionet e tyre, si edhe ka vlerësuar maksimalisht punën e bërë nga GJKKO, BKH etj.

Fjala e plotë e ambasadores amerikane, Yuri Kim në aktivitetin “Drejtësi për të gjithë”

Të nderuar anëtarë të Gjykatës së Lartë, Këshillit të Lartë Gjyqësor, kryetarë të Gjykatave, kancelarë të Gjykatave, anëtarë të Shkollës së Magjistraturës në Shqipëri, partnerë dhe miq të dashur. Faleminderit që keni ndarë kohën tuaj me ne sot dhe faleminderit për mundësinë që t’ju drejtohem të gjithëve ju. I vlerësoj shumë shpjegimet që ju të gjithë keni ndarë me ne në lidhje me gjendjen aktuale të reformës në drejtësi në Shqipëri.

Investimet e SHBA në sektorin e drejtësisë po japin rezultat. Më inkurajon mënyra se si gjykatat në të gjithë vendin kanë përmirësuar punën e tyre të përgjithshme, se si Gjykata e Lartë u organizua për të trajtuar numrin në rritje të çështjeve të prapambetura, dhe se si Shkolla e Magjistraturës krijoi një program për edukimin e brezave të ardhshëm të profesionistëve ligjorë.

Siç kam thënë më parë: Reforma në drejtësi nuk është e shpejtë, nuk është e lehtë dhe as nuk është e përsosur. Ky është një udhëtim që do kohë dhe përpjekje të qëndrueshme. Nuk ka asnjë alternativë: reforma në drejtësi është jetike për suksesin e Shqipërisë si shtet, jetike për suksesin e saj si ekonomi, dhe jetike për të pasur sukses në krijimin e mundësive për popullsinë e saj të zgjuar, energjike dhe punëtore. Kjo është një shtyllë e rëndësishme për të realizuar të ardhmen e Shqipërisë në Europë, si anëtare e familjes së demokracive evropiane. Ashtu si me çdo sipërmarrje gjithëpërfshirëse, e vetmja mënyrë për të arritur atje ku po shkojmë është njëri hap pas tjetrit, duke hedhur një këmbë pas tjetrës.

Më lejoni të jem e qartë: SH.B.A. e mbështet plotësisht reformën në drejtësi të Shqipërisë dhe aspiratat e anëtarësimit të saj në BE. Ne jemi me ju krah për krah. Unë jam angazhuar personalisht si përfaqësuese e Presidentit të Shteteve të Bashkuara për të bërë gjithçka që mundem për të promovuar këtë reformë si një mjet për të arritur një të ardhme më të drejtë, më demokratike dhe më të sigurt për shqiptarët. Projekti “Drejtësi për të gjithë” ka qenë njëri prej angazhimeve të shumta të SHBA-ve për të mbështetur reformën në drejtësi të Shqipërisë. Mbështetja jonë do të vazhdojë.

Ne jemi të përkushtuar të punojmë me ju për të siguruar që sistemi gjyqësor shqiptar të jetë tërësisht i plotësuar dhe funksional. Duam atë që do populli shqiptar: që njerëzit që janë në karrigen e gjykatësit ose që përfaqësojnë prokurorinë të jenë gra dhe burra me integritet dhe mirëbesim, dhe që i shërbejnë popullit dhe i shërbejnë shtetit të së drejtës – jo interesave ngushta ose kriminale. Ne duam ligje dhe sisteme që janë krijuar për të kufizuar mundësitë për korrupsion dhe institucione të ngritura që të mund të parandalojnë efektivisht korrupsionin e nivelit të lartë, të luftojnë krimin e organizuar dhe të ndëshkojnë autorët e këtyre.

Do të vazhdojmë me ndihmën për zvogëlimin e numrit të madh të dosjeve të prapambetura të Gjykatës së Lartë, duke vijuar programin e nisur për këtë qëllim nga “Drejtësi për të gjithë”. Ne do të vazhdojmë të punojmë ngushtë me SPAK për t’u siguruar që prokurorët dhe hetuesit e tij të jenë të trajnuar mirë, të pajisur mirë dhe shumë të efektshëm. Do të vazhdojmë të mbështesim procesin e vetingut për të ndërtuar besimin që sistemi shqiptar i drejtësisë siguron vërtet drejtësi për të gjithë.

Përmes Akademisë së re të Transparencës SH.B.A.-Shqipëri, ne do të përmirësojmë transparencën dhe llogaridhënien në sektorin publik dhe privat, duke lidhur së bashku grupet e interesit për të çuar më tej Shqipërinë në rrugën drejt integrimit në BE. Akademia do të promovojë etikën dhe zhvillimin haptas të biznesit dhe politikës dhe do të krijojë kapacitetin për të rritur standardet në përputhje me Bashkimin Evropian. Në këtë mënyrë, Akademia do të sigurojë aftësinë për të bërë biznes në mënyrë më transparente, do të ketë funksione vëzhguese dhe mbikëqyrëse, si dhe mjete për rritjen e llogaridhënies.

Ndërkohë që janë bërë arritje në përmirësimin e funksionalitetit dhe integritetit të sistemit të drejtësisë, të gjithë e dimë që puna nuk ka mbaruar. Ne vazhdojmë me mbështetjen tonë për institucionet e vlerësimit kalimtar (vetingut) përmes pranisë së vëzhguesit ndërkombëtar të SHBA dhe rolit të Ambasadës Amerikane në Bordin e ONM, si garantues të procesit. Ne monitorojmë përparimin e institucioneve të reja të drejtësisë dhe i nxisim ato të qëndrojnë të forta kundër trysnisë ekstreme për t’i përkulur dhe për t’i përfshirë në korrupsion e veprimtari kriminale, që me siguri do të minonte të ardhmen e ndritur të Shqipërisë.

Reforma në drejtësi duhet të jetë efektive dhe ka nevojë gjithashtu për mbështetës; persona të cilët sigurohen që këto përpjekje të jenë të suksesshme. Shqipëria ka nevojë për njerëz si ju që të jenë përkrahësit e saj. Që të ngrihen, të marrin vendime të vështira dhe të ndëmarrin veprime. Që të bëhen nëpunës publikë të përkushtuar, që e fitoni pozicionin tuaj të besimit publik përmes angazhimit të përditshëm dhe veprimeve etike.

Prandaj sot kërkoj përpjekjen dhe angazhimin tuaj të ripërtërirë, për t’u siguruar që përparimi i deritanishëm të mos lëkundet dhe që ne të vazhdojmë këtë përpjekje së bashku, krah për krah, për ta kryer reformën në drejtësi. Shkalla tjetër në këtë udhëtim përparues është përpara syve tanë dhe unë pres të kemi një Gjykatë të Lartë plotësisht funksionale dhe qasje të përshpejtuar, të barabartë në drejtësi në të gjithë vendin.

Në fund, do të doja të falënderoja Anne Trice dhe ekipin “Drejtësi për të Gjithë” për punën e tyre të jashtëzakonshme gjatë pesë viteve të fundit. Faleminderit secilit prej jush për përkushtimin dhe angazhimin tuaj. Kjo veprimtari feston këto arritje dhe vlerëson përpjekjet tuaja. Përkundër kaq shumë sfidave, mund të themi se reforma në drejtësi në Shqipëri ka bërë një rrugë të gjatë dhe se vendi juaj është në një pozicion më të mirë tani krahasuar me kohën kur e nisëm këtë. Ne jemi krenarë që jemi me Shqipërinë në këtë rrugëtim.

Faleminderit!

I.K./ReportTv.al
Komento

Komente

  • Leone: 09/04/2021 21:06

    Rezultat te reformes ne drejtesi do te kete vetem neqoftese shqiptaret do shohin te hapen dosjet e krimineleve dhe te padroneve te krimit qe kane 30 vjet qe e mbajne rob kete vend e kete3 popull dhe qe quhen Like Gold Metaj;Salih Ram Vicidoli i 21 Janarit dhe jo vetem;LuliBasha i rruges se Kombitdhe i 21 janarit , tavarish Basha,Monika Like kriemadhja-Metaj ,kampionia ne sportin e hedhjes se cizmeve e te b......;,Mehdi Gerdeci me 26 te vrare e shume te plagosur ne kurriz e me radhe.Ka autoritet zonja Kim qe dosja e Izet Haxhise te gjykohet dhe jo nga kamikazi i Berishes Lazer Sallaku,i cili banditin vicidolas ka vendosur paraprakisht te mos e therrase as deshmitar? Aty duket se sa sukses do kete reforma ne drejtesi.Nuk mund te thuhet se ka sukses reforma ne drejtesi kur banditi president perjashton nga Gjykata Kushtetuese Arta Vorpsin dhe fut ne menyre djallezore ,Xhaferllarin,me kontakte kriminale dhe pa kaluar vetingun dhe anbasada amerikane hesht e trenbur nga kamikazi sheik i presidences Ilir 7%-shi e i floririt te Krrabes dhe jo vetem!Si mund te ndodhe qe 99,99% e gjyqtareve e prokuroreve detyrohen te kalojne vetingun,kurse per mafiozen Xhaferllari,kamikazen e Metes e te lidhur me krimin e organizuar te behet perjashtim e te mos guxoje njeri te flase e ne vecanti ambasada amerikane,e cila e ka marre ne patronazh kete reforme madheshtore?!!!Eshte e mundur qe ne gjykaten me te rendesishme te vendit te rehatohet nje person i akuzuar per marrerdhenie me persona kriminele si Xhaferllari?!!!SPAK-u duhet te merret me keta neqoftese e ka seriozisht se do te luftoje krimin e politikanet e korruptuar qe e komandojne dhe e frymezojne krimin nese do qe shqiptaret te kuptojne e te flasin per sukses te reformes ne drejtesi, Sepse ata qe ka kapur deri me tani reforma ne drejtesi mund te kapeshin dhe pa kete te ashtuquajtur reforme!Atehere perse duhet SPAKU apo BKH-ja qe pritet te ngrihet kur ta lejoje Meta e Berisha me qehajajte e tyre Monika- Basha e me xhagajduret e opozites se bashkuar me ne krye Mehdiun e Gerdecit qe do i ngrene duart kunder reformes e kunder cdo gjeje pozitive qe behet ne kete vend nga qeverria e partia socialiste me urdher te tyre,sepse jane te detyruar te paguajne kandidimin e tyre dhe mbrojtjen "politikane=kriminale" qe dyshja siameze BerishoMeta u kane bere e u bejne?!

    Përgjigju
  • eee: 09/04/2021 19:59

    une thashe se mbeshtesni integrimin me 52 shtetet e bashkuara te USa, te beheshin ne i 53ti.... me paskan bere syte. zgjidhni nje here problemin e drejtesise ne amerike pastaj filloni exportoni ne mase zgjidhjet .... sic ju a do dhe sera dhe keni bere deri tashti me nje sukses qe edhe ha debat.

    Përgjigju
  • Sondazhi i ditës:

    A është gati Shqipëria për sezonin e ri turistik?