Punonjësi i IMT-së Tiranë, Klajdi Zhilla, i cili ishte shpallur në kërkim për rastin e marrjes së 1 mijë eurove ryshfet për të mos hequr tendën e një lokali në Kombinat, është vetëdorëzuar në polici. Zhilla është paraqitur mbrëmjen e së premtes në komisariat i shoqëruar nga avokati i tij, Andi Skënderi.
Edhe pse arriti që të largohej në momentin e ndërhyrjes së policisë dhe u shpall në kërkim si personi që mori paratë nga pronari i subjektit, Zhilla, i cili kishte vetëm dy muaj që ishte pjesë e IMT-së, ka pretenduar në dëshminë paraprake se nuk e dinte se ishte në kërkim dhe se e ka mësuar nga mediat.
Ndërkohë, sot GJKKO la në fuqi masën e sigurisë “arrest në burg” për inspektorin tjetër Geraldo Fuçia, i cili akuzohet si personi që i kërkoi paratë pronarit të subjektit. Para togave të zeza, ai ka pretenduar se nuk ka kryer asnjë veprim dhe se takimin dhe marrjen e parave e ka bërë kolegu i tij Klajdi Zhilla.
"Nuk e njoh fare qytetarin, as e kam kontaktuar, as takuar, as nuk di gjë për rryshfetin. Deklaroj me përgjegjësi morale dhe ligjore se nuk kam lidhje me këtë histori. Unë e ushtroj detyrën me seriozitet dhe profesionalizëm, si në dhjetëra raste të tjera të aksionit për lirimin e hapësirave publike.", ka deklaruar ai.
Avokatët e tij kërkuan një masë më të butë sigurie deri në qartësimin e situatës dhe rrethanave, e cila nuk u pranua nga gjykata.
Punonjësit i IMT-së u kallëzuan nga vetë pronari i lokalit, se i kishin ofruar një marrëveshje që të mos ia prishnin tendën, kundrejt 1 mijë eurove. Policia, me miratimin e SPAK-ut, nisi përgjimet dhe më pas simuloi dhënien e parave.
Në kohën kur 1 mijë eurot iu dorëzuan punonjësit Klajdi Zhilla, 3 kolegët e tjerë e prisnin brenda një lokali tjetër aty pranë. Policia ndërhyri menjëherë në lokal dhe në ato momente inspektorët i fshehën paratë në një gotë në banakun e lokalit.
Inspektori Klajdi Zhilla arriti të largohej me një automjet tip “Audi”, ndërsa 3 të tjerët u ndaluan. Prej tyre, në arrest në burg u la vetëm Geraldo Fuçia, si personi që kishte kërkuar ryshfetin, ndërsa Zhilla u shpall në kërkim pasi ishte ai që mori paratë nga pronari i objektit.
Dy të tjerët, një inspektor dhe menaxheri i lokalit, i cili dyshohet se ka ndihmuar në fshehjen e parave, po hetohen në gjendje të lirë.
Policia sekuestroi paratë që u gjetën në banakun e lokalit, të cilat korrespondonin me numrat serialë të kartëmonedhave që i dha kallëzuesit. Por, krahas tyre, u gjetën edhe 3 mijë euro dhe 27 mijë lekë, të cilat dyshohet se mund t’u jenë marrë subjekteve të tjera, në këmbim të mosprishjes së tendave pa leje.
Foto: Klajdi Zhilla
Report Tv ka siguruar foton e Klajdi Zhillës, punonjësit të IMT-së i cili mori 1 mijë euro ryshfet për të mos hequr tendën e një lokali në zonën e Kombinatit.
I riu arriti të largohej me makinë tip "Audi" në momentin e ndërhyrjes së policisë, ndërsa vetëm një ditë më parë (29 gusht) ai u vetëdorëzua në polici nën shoqërimin e avokatit të tij.
Është vetëdorëzuar në polici punonjësi i IMT -së së Tiranës, Klajdi Zhilla, i cili ishte shpallur në kërkim gjatë një operacioni të SPAK dhe policisë, pasi mori ryshfet për të mos hequr tendën e një lokali në Kombinat.
Mësohet se ai është paraqitur në polici të premten, i shoqëruar nga avokati Andi Skënderi. Ai akuzohet për korrupsion pasiv dhe shpërdorim detyre, ndërsa në dëshminë paraprake ka pretenduar se nuk e dinte që ishte në kërkim dhe e ka mësuar nga mediat.
"Në vijim të operacionit policor të koduar “Hapësira publike”, specialistët e Sektorit për Hetimin e Korrupsionit në Drejtorinë për Hetimin e Krimeve Ekonomike dhe Financiare bënë ndalimin e shtetasit K. Zh., 35 vjeç, banues në Tiranë, inspektor i IMT, bashkia Tiranë, i cili u vetëdorëzua në Policinë e Tiranës.
Ky shtetas ishte i shpallur në kërkim, në kuadër të operacionit “Hapësira publike”, për veprat penale “Korrupsioni aktiv i personave që ushtrojnë funksione publike” dhe “Shpërdorimi i detyrës”, të kryera në bashkëpunim.
Materialet procedurale u referuan për veprime të mëtejshme në Prokurorinë e Posaçme kundër Korrupsionit dhe Krimit të Organizuar.", njoftoi policia.
Komente
Në IMT janë të gjithë hajdutë,këta mostra që u kapën lekët që marin i ndajnë me shefat,kështu veprohet në çdo vend,polici i jep shefit,lekët që jep për tu operuar ndahen të grupi etj.etj.kështu është vepruar gjithmonë sepse po nuk dhe të heqin.
Përgjigju