SARANDË- Një 14-vjeçare ka rrezikuar mbytjen në Plazhin e Centralit në Sarandë. Adoleshentja Z. M 14 vjec nga Gjirokastra është nxjerrë nga uji nga rojet e plazhit të ndihmuar edhe nga pushues të tjerë, të cilët kanë telefonuar ambulancën dhe Policinë.
Sipas një pushuesi, shërbimi i urgjencës ka vonuar të përgjigjet dhe se linjat dilnin të zëna. Sipas mjekëve në Spitalin e Sarandës, 14-vjeçarja po merr ndihmën mjekësore dhe gjendja e saj vlerësohet jashtë rrezikut për jetën.
Fatmirësisht ky është një nga ato rastet që kanë përfunduar me fund të lumtur, pasi në ato momente ka pasur roje bregdetare. Report Tv prej ditësh ka raportuar për këtë problematikë, për mungesën e rojeve bregdetare, por nuk ka pasur një reagim të mirëfilltë, pasi ende sot ka plazhe që kabinat janë bosh. Në të gjitha vijën bregdetare nevojiten 250 vrojtues, por aktualisht janë vetëm 70 persona të certifikuar.
