Një 18-vjeçar u lirua nga një gjykatë në SHBA nga të gjitha akuzat për vrasjen e 2 personave pasi deklaroi se po vetëmbrohej kur qëlloi me armë gjatë trazirave për çështje racore në Kenosha, të Uiskonsinit në vitin 2020.
Teksa ka shprehur zemërimin për këtë vendim, Presidenti i SHBA Joe Biden tha se ai dhe shumë amerikanë të tjerë ndihen "të zemëruar dhe të shqetësuar" për lirimin e Kyle Rittenhouse për vrasjen e dy burrave dhe plagosjen e një njeriu të tretë - por gjithashtu tha se njerëzit duhet t'i "binden" verdiktit të jurisë.
Biden bëri thirrje për qetësi në Kenosha, Wisconsin, duke pranuar emocionet e forta që çuan në trazira civile dhe të shtëna nga Rittenhouse atje vitin e kaluar, dhe të cilat autoritetet janë të shqetësuara se mund të përsëriten pas lirimit të tij.
“I bëj thirrje të gjithëve që të shprehin pikëpamjet e tyre në mënyrë paqësore, në përputhje me sundimin e ligjit. Dhuna dhe shkatërrimi i pronës nuk kanë vend në demokracinë tonë”, tha presidenti në një deklaratë.
"Shtëpia e Bardhë dhe autoritetet federale kanë qenë në kontakt me zyrën e Guvernatorit Evers për t'u përgatitur për çdo ndodhi në këtë rast, dhe unë kam folur me Guvernatorin këtë pasdite dhe kam ofruar mbështetje dhe çdo ndihmë të nevojshme për të garantuar sigurinë publike", vijon deklarata.
Biden fillimisht foli me gazetarët menjëherë pasi një juri e shpalli Rittenhouse të pafajshëm për të pesë akuzat penale.
"Unë i qëndroj asaj që juria ka përfunduar," tha Biden jashtë Shtëpisë së Bardhë. "Sistemi i jurisë funksionon dhe ne duhet t'i përmbahemi", tha presidenti.
Menjëherë pas kësaj, Shtëpia e Bardhë lëshoi një deklaratë me shkrim nga Biden.
“Ndërsa verdikti në Kenosha do të lërë shumë amerikanë të ndihen të zemëruar dhe të shqetësuar, përfshirë edhe mua, ne duhet të pranojmë se juria ka folur”, tha Biden.
Kyle Rittenhouse, 18 vjeç, qau pasi u lirua nga të gjitha akuzat për të shtënat në Kenosha më 25 gusht 2020. Rittenhouse gati u rrëzua pasi mësoi fatin e tij të premten nga një juri prej shtatë grash dhe pesë burrash pas tre ditë e gjysmë diskutimesh. Të shtënat ndodhën gjatë një nate protestash për dhunën e policisë kundër një afrikano-amerikani në verën e trazuar të vitit 2020. Rittenhouse është i bardhë, ashtu sikurse dhe viktimat e tij. Juria dukej se ishte në pjesën dërrmuese me anëtarë të bardhë.
K.T.//ReportTv.al