Dilemës i jepet fund. Edhe pse mungon në parlament prej 6 muajsh për shkak se ndodhet në arrest shtëpie, Sali Berisha nuk do ta humbë mandatin e deputetit.
Në mbledhjen me dyer të mbyllura të konferencës së kryetarëve, Kryetarja e Kuvendit Lindita Nikolla tha se mungesa e tij për shkak të arrestit nuk konsiderohet mungesë pa arsye, çka do të kishte rrezikuar mandatin e tij.
Të njëjtën gjë, e konfirmoi edhe kreu i grupit të PD Gazment Bardhi.
“Sot Kryetarja e Kuvendit, lexoi drejt kushtetutën sa i përket mandatit të kreut të opozitës Sali Berisha. Strukturat ligjore te kuvendit argumentuan se Sali Berishës nuk i ndërpritet mandati pasi mungesa e tij në Kuvend nuk është pa arsye”, tha Bardhi.
Mini-fitoren, Bardhi e shoqëroi edhe me një kërkesë:
“Ne kërkuam që zotit Berisha, ne përputhje me kushtetutën t’i krijohet mundësia që të ushtrojë të plotë mandatin e deputetit duke marrë pjesë me seancat parlamentare dhe aktivitetet e tjera parlamentare. Në mënyrë arbitrare i pengohet ushtrimi i mandatit të deputetit”, u shpreh Bardhi.
Sali Berisha preku Kuvendin për herë të fundit më 21 dhjetor të vitit të shkuar, ditë kur Kuvendi vendosi heqjen e imunitetit për t’i hapur rrugë vendosjes së tij në arrest shtëpie, ndërsa i pezulloi edhe rrogën e deputetit e dietat.
Berisha ndodhet në arrest shtëpie prej 30 dhjetorit, nën hetim për aferën e privatizimit të ish-kompleksit partizani.
Komente
Ikni o pisa ju jeni te gjithe bashke…
Përgjigju