Nga Gjermania, nëpërmjet dy avokatëve të tij mbrojtës atje, Arbër Çekaj i dyshuar si personi që qëndron pas trafikut të 613 kg kokainë me kontenierët e bananeve nga Kolumbia në Maminas mohon akuzat.
Nëpërmjet një deklarate për shtyp ai shprehet se s'ka dhënë asnjë deklaratë deri në këto momente për hetuesit gjermanë, mohon akuzat për trafik ndërkombëtar narkotikësh dhe ndodhet në pritje të procesit të ekstradimit.
Ky qëndrim i Çekajt është bërë publik nga deklarata për shtyp e avokatëve gjerman shpërndarë për mediat nga kreu i dhomës së avokatisë në shqipëri, avokat Maks Haxhiaj. Pak ditë më parë nga burime pranë Krimeve të Rënda, Report Tv mësoi se autoritetet gjermane i kanë komunikuar palës shqiptare se Çekaj po hetohet prej tyre çka pamundëson ekstradimin e tij në një kohë të shpejtë drejt vendit tonë ku ndaj tij ka një masë sigurie arrest me burg në mungesë.
