Çdo 8 Mars bëhemi euforike. Jemi mes një marramendje koke dhe dilemës së përhershme: Është ditë për të festuar, për të protestuar apo për të reflektuar. Ta themi tamam: Në Shqipëri janë më shumë gratë e vajzat që festojnë dhe protestojnë, aq sa kanë mbetur nga ndonjë ojf apo organizatë me ambicje politike. Në fund të fundit, secila merr lirinë e saj dhe bën me të çfarë do çdo 8 Mars.
Mediat me të drejtë na kujtojnë historinë e datës dhe historitë e luftërave të gjata e të lodhshme të grave kudo në botë për t’u empancipuar. Të rejave mund t’iu duken asgjë, por historia e gruas që njohim sot në Ballkan, Europë, e në botën mbarë, ka kaluar mes vështirësive të paimagjinueshme për të fituar këto të drejta.
Le të marrim të drejtën e votës dhe të kujtojmë disa data dhe vende ku dhe gruaja e fitoi këtë mundësi shprehjeje:
• Zelanda e Re (1893) – Vendi i parë në botë që u dha grave të drejtën e votës.
• Australia (1902) – Me disa kufizime për gratë autoktone.
• Finlanda (1906) – Vendi i parë evropian që miratoi votën universale.
• Mbretëria e Bashkuar (1918) – Fillimisht vetëm për gratë mbi 30 vjeç; barazia me burrat u arrit në 1928.
• Shtetet e Bashkuara (1920) – Me Amendamentin e 19-të të Kushtetutës.
• Franca (1944) – U miratua gjatë Luftës së Dytë Botërore, u zbatua në 1945.
• Shqipëria (1 dhjetor 1945)
• Italia (1945) – Gratë votuan për herë të parë në 1946.
• Zvicra (1971) – Vendi i fundit në Evropën Perëndimore që e miratoi në nivel federal.
• Arabia Saudite (2015) – Një nga vendet e fundit që i dha grave të drejtën e votës.
Të drejtat që kemi sot i marrim të mirëqëna dhe nuk mund ta imagjinojmë se mundimi për t’i fituar, nuk ka të krahasuar me lehtësinë që mund të bëjë që çdo e drejtë e fituar të fshihet në pak sekonda me një deklaratë, apo me një laps nga individë autoritarë. Mjafton të shikojmë se shtete që sot janë në çatinë e vendeve më të përparuara, të pasura, të zhvilluara, nuk është se kanë qenë të kollajshëm apo zemërgjerë sa herë është folur për të pasur gra me të drejta të barabarta në shoqëri.
Sa mirë që festuam dhe u përqafuam edhe këtë 8 Mars, por mos harrojmë se çdo e drejtë e fituar, është ar, oksigjen, jetë për gruan anembanë. Misioni i të gjithave, duke kërcyer, duke ngrënë e pirë, apo duke protestuar, duhet të jetë vetëm 1: Të mos i lëshojmë.
Komente
Grate ne Shqiperi kane 2 dekada e 1/2qe kane fituar te drejten te jene funksionale dhe funksionare ne cdo fushe te zhvillimit ekonomik, politik dhe social. Ne cdo rast me ka bere pershtypje evoluimi i femres, ne sensin, qe sa me afer afrohet ne barazi me meshkujt ( ne politike dhe vecanerisht ne biznes), aq me shume denigrojne dhe segregojne specien e tyre... grate.
Përgjigju