Në 9-mujorin e burgosjes së Ilir Metës, i pandehur nga SPAK për tre akuza, Partia e Lirisë njoftoi një konferencë të jashtëzakonshme për shtyp. Megjithatë, Sekretari i saj i Përgjithshëm Tedi Blushi dhe avokati Kujtim Cakrani, përsëritën të njëjtat pretendime dhe akuza për persekutim politik të ish Presidentit.
“Metës i janë penguar qëllimisht takimet me deputetë, eurodeputetë, me familjarë si motra dhe fëmijët, si dhe me avokatët. Rrëmbimi i Metës dhe izolimi politik i tij ka ndodhur fund e krye për arsye se regjimi i tmerruar nga të vërtetat e Metës edhe kur thuhen nga kabinat telefonike të burgut 313 po i cenon lirinë e fjalës si masë represive që ndodhi veçanërisht pas dy lidhjeve telefonike me gazetarë. Ai dhe familja e tij janë në përgjim, nga punonjës anonim të BKH”, tha Blushi.
Rrezik shumë të madh për demokracinë e quajti edhe avokat Cakrani trajtimin e Ilir Metës.
“E kanë harruar Presidentin në qeli, edhe enver hoxha ore me ligj i dënonte. Ndaj zotit Meta ka zero prova. Nuk ka shkelje. Ne nuk do t’i ndalemi kësaj beteje. Edhe sikur ata të mbyllin dosjen dhe të pushojnë akuzat.", u shpreh Cakrani.
Ilir Meta, i pandehur për korrupsion, pastrim parash dhe fshehje pasurie, qëndron në paraburgim që prej 21 tetorit 2024. Masa e tij e sigurisë është konfirmuar deri në Gjykatën e Lartë, ndërsa tashmë ish Presidenti shpresën e vetme e ka në Gjykatën Kushtetuese ku kërkon lirimin për shkelje të të drejtave të njeriut.
Së bashku me ish Ish-Presidentin Meta e pandehur për dosjet e dosjet e CEZ-DIA, lobimin në SHBA dhe hetimin pasuror është edhe ish bashkëshortja e tij Monika Kryemadhi.
Komente
