Sot është seanca e fundit plenare e kësaj legjislature, por edhe e fundit për disa deputetë, që nuk do të jenë më në Kuvend. Disa prej tyre, teksa po hynin në Kuvend folën për ndjesitë e këtyre katër viteve si deputetë por edhe për faktin se nuk do të jenë më pjesë e kuvendit, pasi disa nuk kandiduan e disa të tjerë s’fituan dot.
Ermonela Felaj e PS, e cila ishte kanditate më 11 maj por nuk siguroi dot një mandat, tha për gazetarët se do të vazhdojë të jetë aktive me ligjin, nga i cili thotë se nuk është ndarë që pas studimeve. Pyetjes se ku do ta shohim në shtator, ajo preferoi të mos komentojë por shtoi se nëse do të ketë hapësirë në politikë, do të jetë aktive.
“Besoj se puna ime e lidhur me ligjin dhe drejtësinë më ka shoqëruar që pas studimeve. Peng nuk kam. Do të ishte pritje për gjithsecilin për të parë se çfarë do të jetë angazhimi. Nuk jam shkëputur nga puna me organet e drejtësisë dhe akademizmin. Kjo do të vijojë. Nëse ka hapësirë, nuk do të ketë hezitim që të jenë aktive në politikë. Do të duhet t’ju kthej mbrapsht respektin të atyre njerëzve që më kanë mbështetur në këto 16 vite. Kur jam bërë pjesë e PS, ka pasur ndryshim të fortë. Kam qenë pjesë e këtij ndryshimi kështu që nuk kam asnjë lloj paragjykimi për pjesën e re që hyn në parlament. Iu uroj suksese.”, u shpreh Felaj.
Toni Gogu, i cili nuk arriti që të ‘rinovojë’ mandatin e deputetit, tha se ndihet i privilegjuar që ishte pjesë e një legjislature, që e çoi përpara procesin e integrimit të vendit.
"Ndihem i privilegjuar, një përvojë e mrekullueshme në jetën time profesionale. Dhe gjithashtu i privilegjuar që të kem qenë pjesëtar i një legjislature që ka çuar integrimin evropian edhe një cm më tutje. Besoj se do më mungojë jeta parlamentare. Në shtator do të jem atje ku do të ketë nevojë. Nuk kam pritshmëri për funksion. Nuk kam ardhur për funksione, kam ardhur për të shërbyer. Kam qenë qytetar aktiv në politike dhe do të vazhdoj të mbetem.”, u shpreh Gogu.
Dhurata Çupi e PD-së, që mbeti gjithashtu jashtë Kuvendit më 11 maj, tha se ndihet krenare për punët që ka bërë dhe se do ta marrë malli për kauzat që ka ngritur në parlament.
"Ndihem krenare për punën që kam bërë në parlament. Falënderuese PD që e kam përfaqësuar, edhe ju mediave, jeni një grup gazetarësh të jashtëzakonshëm. Unë kam punuar 20 vjet në administratë publike, që nga 2016 jam deputete. Fillon të kthehet në profesion politika, do më mungojë por...në shtator jam eksperte modestisht e mirë e ligjit kështu që besoj në profesionin tim. Më shumë malli do të më marrë malli për kauzat që kam ngritur.”, u shpreh deputetja.
Denis Deliu u shpreh: “Në shtator në detyra të tjera. Gjithmonë ka vend për më mirë, por jam krenar për gjithçka kam bërë në këto 4 vite.”
Deputeti socialist Nasip Naço, i cili u tërhoq nga kandidimi më 11 maj, tha se është ‘dielli që ka perënduar’ në politikë.
“ Unë jam dielli që po perëndon në politikë. Shikoni diellin e mëngjesit. Besoj se çdo palë zgjedhje, elementë më të mirë vijnë. Nuk është ironi. Zgjedhja ime që të dal nga politika. Në shtator si gjithë qytetarët e tjerë. Kam një licencë avokati.”, u shpreh ai.
Blerina Gjylameti, e cila mbeti jashtë Kuvendit pasi u mund me një diferencë të pakët votash nga kolegia tjetër socialte Olta Xhaçka, tha se ndihet mirë sikurse edhe ditën e parë kur nisi legjislatura që tashmë po përfundon.
“Ndihem po aq mirë sa ditën e parë se ka rëndësi më tepër se çfarë përfaqëson dhe qëndrimi dinjitoz që ke patur. Nuk mendoj që është fundi, është vazhdimësi e asaj që kam patur gjithmonë, e angazhuar në politikë që nga fillimi e po aq e angazhuar në shoqëri. Nuk mendoj se ka një punë që s’do të mungojë sidomos kur e bën me qejf dhe pasion. Në shtator do të jemi këtu bashkë.”, u shpreh ajo.
Për mediat foli edhe Monika Kryemadhi, e cila tashmë nga politikane duket se po i lë vend artit. Ajo është angazhuar në një film, ndërsa shtoi se së shpejti mund të nisë një projekt të ri.
“Nuk më vjen keq fare se fusha tjetër me të cilën po merrem është më e bukur, më me emocion, me ritëm...”, tha Kryemadhi.
Komente
