Aguliçja është një nga bimët më të fuqishme që na dhuron natyra jonë, një lule e vogël, por me fuqi vërtet të mëdha! E njohur që nga kohët e gjysheve tona, kjo mrekulli e natyrës lulëzon në pranverë, por shëron gjatë gjithë vitit. Me vetitë e saj qetësuese, kundër stresit, pagjumësisë, shqetësimeve kardiake, pastrimit të gjakut dhe shumë problemeve të tjera shëndetësore, ajo është një thesar që shumica e njerëzve e kalojnë pa e vënë re. Në këtë bisedë në "Rreze Dielli" në Report TV, me specialistin e bimëve mjekësore Ylli Merja, zbulojmë së bashku si ta njohim, si ta përdorim dhe si të përfitojmë nga kjo dhuratë falas e natyrës.
"Këto lule të verdha relaksojnë trurin, mushkëritë dhe zemrën. Në rrënjët e aguliçes gjenden shumë përbërës kimik, të cilët janë aleate për një shëndet të mirë: saponina, triterpene antiinflamatore e analgjezike. Ndërsa në lule gjenden glikozidet fenolike, flavonoidet - frenuese të sëmundjeve të zemrës, mushkërive, alzaimerit dhe qetësuese të sistemit nervor", thekson Merja në fillim të bisedës.
Sot kjo bimë po studiohet për vetitë antikancerogjene, për trajtimin e alergjive, sëmundjeve reumatizmale, ekzemave dhe puçrave në lëkurë.
"Aguliçja lulëzimin e saj e ka në pranverë, pasi mblidhet mund të përdoret e freskët ose e tharë. Përdorimet në çaj të kësaj bime janë të shumta, të cilat kombinuar dhe me bimë të tjera medicinale sjellin një efikasitet të madh në luftimin e shumë problematikave shëndetësore", thotë specialisti i bimëve mjekësore Ylli Merja.
Përdorimet e çajrave me aguliçe janë të shumta, mund të përdoret si lulja, gjethja ashtu dhe rrënja.
- Për kollën dhe për relaksimin e trurit, qetësimin e sistemit nervor: Në 200 ml ujë përvëlojmë një lugë gjelle me bimën e aguliçes. Pihen 2-3 doza në ditë.
- Për pagjumësinë: Në 0,5 litër ujë ziejmë dy minuta një lugë aguliçe, një lugë bar blete dhe një lugë çaji valerjanë.
- Për largimin e gulçimeve në zemër: Në 0,5 litër ujë ziejmë dy minuta një lugë aguliçe, një dorë murriz lule, një lugë livando. Çaji pihet gjatë ditës.
- Për pastrimin e mushkërive: Në 0,5 litër ujë ziejmë dy minuta një lugë aguliçe, një dorë zhumbricë, tre gjethe dafine ose tre feta xhinxher të njomë. Pihen 2-3 gota në ditë.
- Për shtimin e qumështit te nënat gjidhënëse: Në 0,5 litër ujë ziejmë dy minuta një lugë aguliçe, një lugë lule shtogu, një lugë sherebelë. Çaji pihet gjatë ditës.
- Për trajtimin e ekzemave: Në 1 litër ujë ziejmë 4-5 minuta një dorë lëvore shelgu. Shtojmë një dorë gjethe aguliçe ose lule dhe një dorë angjinare dhe i lëmë të ziejnë për 2 minuta. Me çajin lajmë lëkurën e irrituar 2 herë në ditë.
- Për pastrimin e gjakut dhe largimin e toksinave: Në 0,5 litër ujë ziejmë 2 minuta një dorë hithra, një dorë radhiqe, një lugë aguliçe. Çaji pihet gjatë ditës.
Pyetjes së moderatores se kush nuk duhet ta përdorë aguliçen, Merja i përgjigjet duke thënë se kjo bimë duhet evitur nga personat alergjikë ndaj acidit salicilik, alergji nga aspirina. Gratë shtatëzana, pasi sjell qumësht para kohe si dhe personat që marrin medikamente kundër mpiksjes së gjakut.
SHËNIM i REDAKSISË: Çdo i sëmurë ka veçoritë e tij, ndaj për raste të sëmundjeve dhe problematikave të rënda, duhet gjithnjë këshillimi me mjekët. Ky artikull nuk mund të përdoret për të sugjeruar një kurim për çdo person.
Komente
