140 aktivitete, 84 projekte, botimi i 11 periodikëve dhe rreth 65 tituj veprash, aktesh konferencash a botime promovuese pritet të kryhen nga Akademia e Shkencave gjatë vitit 2025, ndërkohë që ky institucion do të ketë së shpejti entin e vet botues. Kjo është ajo çfarë është bërë me dije gjatë mbledhjes së Asamblesë së Akademisë së Shkencave të mbajtur këtë të premte.
Drejtori i ASH-së, Skënder Gjinushi u shpreh gjatë fjalës së tij, se “objektivi kryesor është rritja e investimeve për shkencën, me programim të qartë, për të arritur te niveli i financimit 1% të GDP-së para vitit 2030, objektiv ky i vënë në Samitin e Akademive e të universiteteve publike në kuadër të procesit të Berlinit, zhvilluar në Tiranë.”
Ndërkohë, ai e ka cilësuar 2024-ën si vitin, që shënoi kthimin e Akademisë nga një institucion thjesht honorifik, në një institucion kryesor aktiv të kërkimit shkencor.
“Për herë të parë pas 17 vjetësh institutet e albanologjisë, Qendra e Studimit të Artit si dhe ajo e bioteknologjisë e gjenetikës e ushtruan aktivitetin e tyre si pjesë aktive e kërkim-studimit pranë Akademisë, si njësi të përhershme të saj.”, - vërejti Gjinushi.
Sipas tij, përvoja jonë gjatë këtij bashkëpunimi, edhe gjatë vitit 2024, objekt analize i mbledhjejes, ashtu si dhe miratimi i një ligji të ri për shkencën, “rikonfirmojnë faktin se dhe në Shqipëri bëhet e duhet bërë shkencë”.
“Investimi për shkencën është investimi më i drejtpërdrejtë për brezat e rinj, është masa më efikase për frenimin e largimit të trurit, madje dhe për rithithjen e tij.”, - vërejti Gjinushi.
“Rikonfirmimi i tezave bazë të albanologjisë jo vetëm i konsolidon ato, por mbi të gjitha lartëson kontributin e Akademisë ndër vite, të plejadës së shkëlqyer të saj në gjuhësi, arkeologji e histori, të Çabejt, Demirajt, Budës, Domit, të katër arkeologëve themeltar. Akademia e Shkencave si institucion, e cila flet nëpërmjet studimeve të saj e figurave e studiuesve qendrorë, nuk është mohuese, por vërtetuese e lashtësisë e origjinës së hershme të shqipes e qenies së saj një degë fillestare e trungut indoeuropian, degë-bijë.”, - vijoi ai.
Ndërsa u ndal specifikisht në një nga temat më të diskutuara së fundmi, atë të vjetërsisë së shqipes, Gjinushi u shpreh, se “në rast se thuhet se Akademia nuk njeh vjetërsinë e gjuhës shqipe e të popullit shqiptar, nuk njeh origjinën e lidhjen iliro-arbërore e arbërore- shqiptare, atëherë kjo iu jep të drejtën atyre që kanë punuar e punojnë në vazhdimësi për të kundërtën, të thonë se kur këto teza nuk i pranon as vetë Akademia e Shqipërisë, atëherë si mund të jenë të vërteta. Kështu, në fakt, në emër të patriotizmit i shërbehet haptas antishqiptarizmit.”
Sipas kryetarit Gjinushi, realizimi ynë më i rëndësishëm gjatë 2024-ës është përgatitja e Fjalorit të madh të shqipes, me 120 mijë lema, nga 100 mijë që ishte parashikimi.
Sot, pranë ASH-së sot ka rreth 500 specialistë të lartë të aktivizuar si anëtarë komisioni, anëtarë e bashkëpunëtorë njësish a pjesëmarrës në projekte.
Komente
