Gjermani-Një aksident i rëndë ka ndodhur në Koblenz të Gjermanisë, ku 3 shqiptarë kanë humbur jetën, ndërsa 4 të tjerë janë plagosur, pasi minibusi me të cilin udhëtonin ka dal nga rruga.
Sipas mediave të huaja, ngjarja tragjike ka ndodhur në orët e para të mëngjesit të kësaj të diele, (25 maj), ndërsa ata po ktheheshin nga një festë familjare kur minibusi me gjithsej nëntë pasagjerë doli nga rruga dhe u përmbys disa herë.
Ministria e Jashtme e Shqipërisë njofton se është njoftuar nga autoritetet gjermane për aksidentin e rëndë, ndërsa po ndiqen nga afër zhvillimet në lidhje me aksidentin.
'Ministria për Evropën dhe Punët e Jashtme është informuar nga autoritetet gjermane për një aksident të rëndë rrugor të ndodhur në orët e para të mëngjesit të datës 25 maj, pranë qytetit Koblenz, ku janë përfshirë disa shtetas shqiptarë. Me keqardhje njoftojmë se si pasojë e këtij aksidenti kanë humbur jetën tre shtetas shqiptarë, ndërsa katër të tjerë janë plagosur dhe po marrin trajtim në spitalet lokale. Ambasada e Republikës së Shqipërisë në Berlin dhe Konsullata e Përgjithshme në Mynih kanë qenë në kontakt të vazhdueshëm me autoritetet gjermane dhe kanë ndjekur nga afër zhvillimet. Hetimet për rrethanat e aksidentit janë ende në vijim.
Ministria për Evropën dhe Punët e Jashtme shpreh ngushëllimet më të sinqerta për familjet e viktimave dhe uron shërim të plotë për të plagosurit. Strukturat tona konsullore kanë ofruar mbështetjen e nevojshme për qytetarët e prekur dhe kanë qenë të angazhuara gjatë gjithë ditës për të ndihmuar në menaxhimin e situatës', njofton Ministria e Jashtme e Shqipërisë.
Asnjë automjet tjetër nuk u përfshi në aksident, ndërsa një zëdhënës i policisë e cilësoi aksidentin si shumë të rëndë.
"Është një aksident shumë, shumë i tmerrshëm", tha një zëdhënës i policisë gjermane.
Komente
