Shkodër- Ndërron jetë edhe i mituri tjetër, futbollisti 13-vjeçar i Akademisë 'Djelmnia shkodrane', i aksidentuar mbrëmjen e kaluar në fshatin Stom-Golem, të Shkodrës.
Së bashku me shokun e tij 16-vjeçar, që humbi jetën i pari pas ngjarjes, ata po udhëtonin me motor dhe pasi humbën kontrollin e mjetit, janë përplasur me një mur. I mituri Fabian Shpati nuk i mbijetoi dot plagëve dhe ndërroi jetë sot në spital.
Ngjarja ndodhi rreth orës 18:20 të ditës së djeshme (14 prill), në vendin e quajtur "Stom Golem", kur motomjeti doli nga rruga.
Policia njoftoi mbrëmë se 16-vjeçari ka humbur jetën në vendin e ngjarjes, kurse shoku i tij u dërgua me urgjencë në spitalin e Shkodrës për mjekim, por për fat të keq ka humbur edhe ai jetën, me gjithë përpjekjet e bluzave të bardha për ta shpëtuar.
Policia vendore po vijon hetimet për të zbardhur dinamikën e aksidentit fatal dhe shkaqet.
Për vdekjen e të miturit ka reaguar edhe klubi i futbollit Vllaznia, pasi Fabian Shpati ishte pjesë e Akademisë së Futbollit ‘Djelmnia shkodrane’.
“Ndarja nga jeta në mënyrë tragjike pas aksidentit të djeshëm e Fabian Shpatit ka qenë një ngjarje e rëndë për të gjithë, përfshirë këtu edhe komunitetin e futbollit, pasi Fabiani 13 vjeçar ishte një lojtar me perspektivë që po rritej tek Akademia e Futbollit “Djelmnia shkodrane”.
KF Vllaznia dhe Akademia Vllaznia i shprehin ngushëllimet më të sinqerta familjes Shpati, e po ashtu edhe Akademisë së Futbolllit “Djelmnia shkodrane”, për këtë humbje të madhe. Prehu në paqe Fabian!”, shkruhet në llogarinë e klubit në rrjetin social Facebook.
Postimi i FK Vllaznia në rrjetin social Facebook, për vdekjen e futbollistit të ri
Komente
