Minatori 52-vjeçar, Sazan Deda ndërroi jetë teksa punonte në minierën e kromit në Bulqizë. Aksidenti i rëndë në punë ka ndodhur paraditen e kësaj të marte në zonën minerare nr 41, me administrator Ardjan Ramën.
Burime për Report TV thanë se Deda ka qenë duke punuar për nxjerrjen e materialit të kromit, dhe gjatë punës, në rrethana ende të paqarta është shembur një masiv kromi duke e zënë poshtë 52-vjecarin.
Kolegët kanë arritur ta nxjerrin trupin e pajetë pas dy orësh. Sipas informacione nga grupi hetimor janë shoqëruar dhe po merren në pyetje dy drejtuesit teknikë të galerisë nr. 41. Ndërsa policia e Dibrës përmes një njoftimi të shkurtër njoftoi vetëm vdekjen e minatorit.
"Në një subjekt minerar në Bulqizë, dyshohet se gjatë punës është aksidentuar me pasojë vdekjen shtetasi S. D., rreth 52 vjeç,(minator). Grupi hetimor ndodhet në vendngjarje po punon për zbardhjen dhe dokumentimin e rrethanave të ngjarjes", njofton shkurtimisht policia e Dibrës.
