Art, kulturë dhe spektakël. Në vijim, rubrika “Ciceron”, ju njeh me aktivitetet që mund të ndiqni sot dhe nesër në Tiranë dhe disa qytete të vend.
1.“FRESH SUMMER” NË KORÇË, ARGËTIM PËR TË GJITHA MOSHAT
Më 30 gusht, duke filluar nga orët e para të mëngjesit e deri në mesnatë, në sheshin para Katedrales në Korçë do të mbahet “Fresh Summer”, një aktivitet plot argëtim dhe spektakël. Për fëmijët nga ora 09:30 – 18:00, do të ketë panair, cirk dhe personazhe të dashur. Në mbrëmje, skena e qytetit do të ndizet me muzikë live, energji dhe drita. Grupi i të rinjve rock dhe emrat e njohur të muzikës shqiptare: Aleksandër Gjoka, Elton Deda e Redon Makashi, do të sjellin spektakël të paharrueshëm.
2. “ETYD PËR DASHURINË” TE “MARGARITA TUTULANI” NË BERAT
“Etyd për dashurinë”, me motive nga vepra “Romeo e Zhulieta” e William Shekspirit, interpretuar nga aktorët e rinj Daniela Sadja & Enis Demarku, me regji të Igli Zarka do të vijë mbrëmjen e 30 gushtit në orën 18:00 në Qendrën Kulturore “Margarita Tutulani” në Berat.
3. KORÇË/“LËVIZJE NË QIELLIN E BRENDSHËM”, EKSPOZITË ME PIKTURA
“Lëvizje në qiellin e brendshëm” është ekspozita personale e piktores Nervina Tabaku, që do të çelet në Galerinë e Artit në Korçë në 30 gusht për të vijuar deri në 7 shtator.
4.FESTIVALI NDËRKOMBËTAR I GJALLICËS NË EDICIONIN E TRETË
Edicioni i katërt i Festivalit Ndërkombëtar Gjallica vjen në Kukës duke filluar nga 29 gushti në orën 17:00, për të vijuar edhe në 30 gusht. Aktiviteti është konceptuar si përkujtim i jetëve të humbura nga masakrat e ushtrisë serbe në Përbreg dhe në të gjithë zonën e Lumës, në vitin 1913. Të pranishmit mund të ndajnë përvoja e nderojnë përmes muzikës, kujtimeve e historive, ndërkohë që do të ketë edhe një prezantim libri.
5. AKTIVITET I HAPUR PËR TRANSFORMIMIN E KALASË SË BASHTOVËS
Më 29 gusht, duke filluar nga ora 18:00 mund të dëshmoni transformimin e Kalasë së Bashtovës, dikur një sit historik i braktisur, përmes një aktiviteti të hapur për publikun. Aktiviteti sjell historinë në jetë me mure të restauruara, një qendër të re vizitorësh dhe një eksperiencë multimediale që lidh të shkuarën me të tashmen.
6. “NUR NDËR MAJA”, EDICIONI I DYTË I FESTIVALIT NË SHIROKË
Festivali “Nur Ndër Maja” vjen në edicionin e tij të II-të në Shirokë sonte, më 29 gusht në orën 20:00. Këtë herë ai do të ketë si vendndodhje qendrën e sporteve ujore dhe kundrimit të shpendëve.
7. RIKTHEHET KOMEDIA “VENDI MË I HUMBUR NË SHQIPËRI”
Komedia “Vendi më i humbur në Shqipëri” rikthehet në Tiranë me disa shfaqje në skenën e Teatrit Kombëtar pranë ArTurbinës. Ajo do të shfaqet në 29, 30 dhe 31 gusht në orën 20:00.
8. FILMAT PËR FËMIJË E TË RRITUR TE “HIMARA OPEN CINEMA”
Java e fundit e gushtit vjen me disa filma për fëmijë dhe të rritur në kinemanë e hapur në Himarë. Sonte në orën 20:15, fëmijët mund të ndjekin filmin “Mulan”, ndërsa nesër filmin “Baby Boss”. Ndërkohë, në orën 22:15, sonte, për të rriturit shfaqet filmi “Hangover”, ndërsa mbrëmjen e nesërme filmi “40 vjeç i virgjër”.
9. VERË NË KOLONJË”, KONCERT I ORKESTRËS I QENDRËS “FAN NOLI”
“Verë në Kolonjë” vijon programin festiv për muajin gusht. Mbrëmjen e sotme dhe të nesërme në sheshin “Rilindja” në Ersekë në orën 20:00 do të ketë një koncert nga Orkestra e Qendrës Kulturore “Fan Noli” të Leskovikut.
Komente
