Art, kulturë dhe spektakël. Në vijim, rubrika “Ciceron”, ju njeh me aktivitetet që mund të ndiqni sot dhe nesër në Tiranë dhe disa qytete të vendit.
1. Pranvera vjen me dy premiera absolute dhe një kryevepër klasike në Teatrin Kombëtar të Operas dhe Baletit. Fituesit e çmimit “Çesk Zadeja” për kompozitorët e rinj, sjellin krijimet e tyre në një koncert më 1 mars në orën 19:00.
2. “15 ditë prilli” është shfaqja që do të vijë në skenën e teatrit “Aleksandër Moisiu” në Durrës më 1, 2, 3 dhe 4 mars në orën 19:00. Pjesa teatrore është një dramatizim mbi romanin me të njëjtin titull i autores Anisa Markarian nën regjinë e Driada Dervishit.
3. “ReRe-Art” titullohet ekspozita që do të çelet këtë të shtunë, më 1 mars në orën 18:00 te “Tulla Center” në Tiranë.
4. Teatri për fëmijë “Rosaku i shëmtuar” shfaqet këtë fundjavë, më 1 dhe 2 mars, në orën 10:30 te “Teatri i Kukullave” në Tiranë.
5. Një përmbledhje magjike nga Cirku Kombëtar do të vijë në skenën e Teatrit të Kukullave në 1 dhe 2 mars në orën 17:00.
6. “Karnavalet e Korçës” është komedia që do të shfaqet këtë premte, më 28 shkurt, por edhe të shtunën dhe të dielën, më 1 dhe 2 mars, në orën 20:00, në skenën e Teatrit Kombëtar pranë ArTurbinës në Tiranë.
7. “Nuk do të gënjejmë më kurrë” është komedia që do të vijojë të shfaqet te Teatri i Kukullave në Tiranë 1 dhe 2 mars, në orën 19:00.
8. “Station Talks: Shpëtim Kelmendi në Shkodër” është takimi që do të mbahet në “Bed & Station Hostel” në Shkodër më 1 mars në orën 18:00. Shpëtim Kelmendi është poet, shkrimtar dhe përkthyes, që është nderuar me disa çmime kombëtare, së fundi për librin me tregime “Dashnia âsht”.
9. Me rastin e 581 vjetorit të Lidhjes së Lezhës, në ambientet e bibliotekës “Vexhi Buharaja” në Berat organizohet mini-sesion shkencor dhe ekspozitë libri e filatelie ditën e shtunë, më 1 mars në orën 10:30.
10. “Samsara” është shfaqja do të vijë në skenën e Teatrit Kombëtar Eksperimental “Kujtim Spahivogli” në Tiranë më 28 shkurt dhe 1 mars në orën 19:00.
11. “Gruaja e burrit tim” është komedia që do të shfaqet më 1 dhe 2 mars në orën 19:00 në teatrin “Skampa” në Elbasan.
Komente
