TIRANË- Komisioni i Medias do t’i kërkojë zyrtarisht Këshillit Drejtues të RTSH ndërprerjen e garës për zgjedhjen e drejtorit të ri të përgjithshëm. Kjo lëvzije e parlamentit vjen pas akuzave që për paligjshmëri të procesit dhe të një gare jo transparente, pasi Këshilli skualifikoi kandidatët me pretendimin se nuk plotësojnë kriteret.
Si rrallëherë, edhe opozita edhe mazhoranca janë në një linjë dhe në mbledhjen e Komisionit u dakordësia që nesër do t’i drejtojnë Këshillit Drejtues shkresën zyrtare ku do t’i kërkohet që mos të vijojnë garën për përzgjedhje, pas të premten është parashikuar dëgjesa me dy kandidatët e vetëm që Këshilli la në garë, Jetmir Shpuzën dhe drejtoren në detyrë, Aurora Polo.
Vetë Partia Socialiste, përmes nënkryetares së Komisionit, Evis Kushi shprehet se garante se do të ndërmarrin çdo hap që u garanton ligji për të garantuar garën e drejtë dhe transparente.
Nga ana tjetër, opozita shkon edhe më tej duke thënë se nëse Këshilli Drejtues i RTSH nuk ndërpret garën, janë gati që të vihen në lëvizje për shkarkimin e anëtarëve. Qëndrimi i PD erdhi përmes kryetares së Komisionit, Ina Zhupa e cila tha se ky nuk është një kërcënim, por nuk mund të lejojnë ligjin, duke theksuar se anëtarët mendojnë se janë pronarë të fakto të RTSH.
"Nuk kemi lidhje me emrat, kemi lidhjet me hapat, duhet të jetë garë e hapur, transparente meritokratike, do i dërgojmë një shkresë siç e kërkuat që të ndërpresin procesin dhe të na informojnë çfarë po ndodh, se kanë të drejtën të mbrojnë punën e tyre nëse po bëjnë punë të drejtë siç pretendojnë ata, sot ose nesër, sepse kanë njoftuar të premten seanca dëgjimore të 2 kandidatëve që kanë zgjedhur", u shpreh Kushi.
"Jemi dakord, të përfshijmë në shkresë edhe faktin që këtë detyrim që i japim për të ndërprerë procesin, nëse nuk e zbatojnë, ne pala e opozitës do të kërkojmë shkarkimin e tyre nga këshilli drejtues. T’ia vendosim që nëse nuk zbatojnë këtë kërkesë të komisionit ne do të jemi të detyruar të vazhdojmë me procedurën parlamentare të anëtarëve të këshillit të drejtimit.
Të 5 që përfaqësojnë pakicën parlamentare në Këshillin Drejtues, jemi të gatshëm ti shkarkojmë, dhe ti kërkojmë Kuvendit emërimin e të tjerëve në përputhje me ligjin, se është krijuar ideja në Këshillin Drejtues që ata s’kanë çfarë bëjnë se na kanë zgjedhur se s’do bien dakord me njëri tjetrin PS-PD dhe mendojnë se janë pronarë të fakto të RTSH. Unë shpreh vullnetin tim në emër të grupit të PD që nëse nuk ndërpresin procesin, që të hënën fillojmë procedurat për procedurat e shkarkimit", vijoi Zhupa.
"Jemi të gatshëm të ndërmarrim çdo hap që na lejon ligji për të garantuar garë të hapur", theksoi Kushi.
Edhe anëtari socialist, Petro Koçi thotë se Këshilli Drejtues ka qenë në shkelje pasi nuk mund të ndalojë kandidatët paraprakisht që të marrin pjesë në garë. Ndërkohë, Zhupa propozoi hetim për konflikt interesi për anëtarët e Këshillit Drejtues të RTSH, nëse ngërçi zgjidhet dhe ata qëndrojnë në detyrë.
“Ky nuk është kërcënim, është paralajmërim siç bën çdo njeri që ka në mbikëqyrje një institucion tjetër, për ta paralajmëruar siç e kërkon ligji që mos të jetë në mënyrë të rrufeshme pse na shkarkuan. Çdo shkelje e ligjit ka një pasojë mbrapa”, tha Zhupa.
“Këshilli nuk mund të shkelë kriteret, mund të përzgjedhë platformat, por që të ndalojë paraprakisht është e paligjshme. Duhet parë mirë çështja e konfliktit të interesit, kemi dëgjuar në këtë sallë se si prej tyre është kërkuar të përfitojnë projekte në Radio Televizion”, u shpreh Koçi.
“Pasi të zgjidhim ngërçin e këtij procesi, nëse ata qëndrojnë ende në detyrë, për secilin të bëhet pjesë skanimi për konfliktin e interesit. S’mund ta kthejmë Këshillin Drejtues njërën dorë në bakllava, tjetrën në revani”, thekson Zhupa.
Gara për zgjedhjen e drejtorit të ri të Radio Televizionit Shqiptar u mbulua nga akuzat për paligjshmëri, pasi Këshilli Drejtues vendosi të hënën me shumicë votash që të skualifikojë 3 nga 5 kandidatët me pretendimin se nuk plotësojnë kriteret për kualifikim. Pesë kandidatë të tjerë ishin skualifikuar më parë për mangësi në dosjet e aplikimit.
Gjatë votimit të së hënës u skualifikuan nga gara kandidatët Eni Vasili, Kliton Rama dhe Ermal Hoxha, duke thirrur në dëgjesë vetëm dy kandidatë; Jetmir Shpuzën dhe Aurora Polon, kjo e fundit drejtore e komanduar e RTSH-së pas dorëheqjes së Alfred Pezës.
Vetë Kryetari i Këshillit Drejtues, Leka Bungo e denoncoi vendimin si të paligjshëm dhe paralajmëroi ankimin e tij në organet e drejtësisë. Sipas Bungos, ngërçi i krijuar mund të zgjidhet vetëm me ‘shkrirjen e këshillit drejtues të RTSH-së’.
Transmetuesi publik është në teori një institucion politikisht i pavarur, por bordi drejtues zgjidhet nga parlamenti në raportin 5 me 6 me shumicë nga socialistët, ndërsa drejtori ekzekutiv zgjidhet nga bordi.
Komente
Në se doni ta shikoni sa vlerë ka TVSH bëheni me kartë dhe mos i mbani gjith popullit taksat sepse është një tv që nuk shikohet...
Përgjigju