Para gjykatës irlandeze, janë paraqitur dy vëllezërit shqiptarë dhe një shtetas rumun që akuzohen për posedimin e 60 kilogramëve kokainë, ku vlera e saj kapte mbi 4 milionë euro.
Bëhet fjalë për Gentjan Dodaj, Donatel Dodaj dhe Daniel Afedoaei, për të cilët gjykata vendosi masën me paraburgim, raporton media vendase.
Mediat e huaja kanë publikuar disa foto ku duket se Gentjan Dodaj, 39 vjeç, mbërriti në seancë dëgjimore me një triko në kokë, duke u munduar që të mbulonte fytyrën. Ai nuk foli gjatë seancës.
Ndaj tij u paracaktua një avokat i shtetit pasi Dodaj kohët e fundit kishte nisur një biznes dhe kishte mbetur pa para.
Për vëllain e tij, Donatelin, 22 vjeç u kërkua një përkthyes. Avokatja e tij tha se klienti i saj kishte mbërritur katër javë më parë në Irlandë dhe se banonte me vëllain.
Ndërkohë sekuestrimi i kokainës u bë pas informacioneve inteligjente ndaj një personi që dyshohej i përfshirë me krimin e organizuar. Të gjithë të arrestuarit do të dalin javës tjetër në gjyq, më 14 Gusht, por ndaj tyre nuk u aplikua masa e lirimit me kusht.
