TIRANË- Një alarm fals për bombë alarmoi autoritetet e vendit. Në e-mailin e Ambasadës së Ukrainës kishte mbërritur një mesazh në të cilin thuhej se në ambientet e ambasadës ishte vendosur bombë, por pas verifikimeve ka rezultuar se ishte një email i rremë.
Policia njofton se bashkë me njësinë Antieksploziv kanë mbërritur në ambientet e ambasadës për të verifikuar, ndërsa evakuuan edhe stafin, por ka rezultuar se njoftimi ishte i rremë.
“Më datë 14.10.2024, në orën 15:38, është marrë njoftim se në adresën e Ambasadës Ukrainase ka ardhur e-mail në të cilin thuhej se në ambientet e ambasadës ishte vendosur bombë.
Shërbimet e Policisë dhe Njësia Antieksploziv kanë shkuar menjëherë në vendngjarje ku kanë bërë evakuimin e stafit të ambasadës dhe pas kryerjes së kontrollit dhe verifikimeve përkatëse, ka rezultuar se njoftimi ishte i rremë”, njoftoi policia.
Shërbimet e Policisë, strukturat e Antiterrorit dhe strukturat e specializuara për Hetimin e Krimit Kibernetik në bashkëpunim me stafin e Ambasadës po punojnë për sqarimin e rrethanave dhe identifikimin e personave përgjegjës për rastin.
