Kosovë-Kryeministri në detyrë Albin Kurti është gjobitur nga Gjykata Themelore e Prishtinës me 250 euro për mosparaqitje në Prokurorinë Speciale të Kosovës (PSRK) për të dëshmuar në lidhje me rastin e rezervave shtetërore, pas tri ftesave të Prokurorisë.
Kurti ka folur për mediat në Kosovë në lidhje me gjobën prej 250 eurosh për mosparaqitjen në Prokurorinë Speciale.
Prononcimi i tij erdhi pas një takimi në kuadër të konsultimeve që po zhvillon me partitë politike për formimin e qeverisë së re. Kurti tha se ndonjëherë dënohet, por u kërkoi gazetarëve të mos mërziten.
“Më dënojnë mua ndonjëherë, por mos u mërzisni ju”, tha Kurti për gazetarët.
Kurti u thirr për herë të parë më 10 dhjetor 2024, por ai nuk u paraqit pasi ndodhej për vizitë jashtë vendit. Pas kësaj, më 19 shkurt 2025, Prokuroria Speciale kërkoi nga Gjykata Themelore që ta obligonte Kurtin të dëshmonte.
Në përgjigje, zyra e Kryeministrit dërgoi një letër në Gjykatën Themelore, ku kërkoi që intervistimi të zhvillohej në ambientet e Kryeministrisë, duke theksuar se kjo ishte një praktikë e zakonshme dhe se Kurti ishte i gatshëm të bashkëpunonte.
Megjithatë, ai refuzoi të paraqitet në Prokurorinë Speciale, duke e konsideruar thirrjen si një veprim të motivuar politikisht. Në datën e fundit të caktuar nga Prokuroria për të dëshmuar, Kurti nuk u paraqit për të dhënë dëshminë e tij, por vendosi të merrte pjesë në një aktivitet tjetër.
Komente
