Prej disa ditësh kancelarja Angela Merkel është parë shumë shpesh në faqet e para të portaleve në Serbi
‘Serbisë i ofrohet një fabrikë e Volkswagenit në këmbim të njohjes së Kosovës’
‘Merkel i kthen shpinën Kosovës, Serbisë i ofrohet anëtarësim më i shpejtë në BE’
Janë këto disa nga titujt e portaleve në Serbi.
Po të vinte dikush nga Marsi në Tokë, do të mendonte se kancelarja gjermane e ka humbur rrugën në ndonjë treg dhe aspak nuk di të bëjë Pazar.
Besueshmëria e këtyre mediave u pa ditën e martë kur ato pohonin se ‘Vuçiç i ka thënë Merkelit që gjërat nuk duhet të shkojnë kështu’ - ndonëse Merkel dhe Vuçiç ende nuk ishin takuar. Duket se dikush nga delegacioni i Vuçiç në SHBA u ka dhënë këtyre mediave një tekst të gatshëm për ta botuar, por ka harruar t'u thotë se takimi ishte shtyrë për një ditë më vonë.
Për përbërjen e bisedës me Merkelin, ka vetëm një person që duhet të tregojë. Dhe ky është Vuçiç.
Nga deklarata e tij mësohet se nga Berlini nuk ka asgjë të re për çështjen e Kosovës. Ndërsa tabloidet e Serbisë e kanë marrë vetëm një gjysmëfjali dhe kanë bërë sensacion. Vuçiç ka deklaruar se Merkel është e mendimit se duhet të "negociohet deri sa nuk gjendet ndonjë zgjidhje". Dhe kjo fjali është interpretuar si ndryshim i qëndrimit të ngurtë gjerman kundër ndryshimit të kufijve.
Në fjalorin e pazarit, Vuçiç ishte i pari me pohimet se ‘shqiptarët nuk duhet t'i fitojnë të gjitha e serbët asgjë’.
Nuk ke nevojë për tepër inteligjencë të kuptosh se ai është i gatshëm të njohë pavarësinë e Kosovës, nëse arrihen kushte të pranueshme. Në vend se të publikojë planin e tij përfundimtar për Kosovën dhe të thotë çfarë do, ai thotë se çfarë nuk do. Vuçiç po bën Pazar dhe jo Merkel.
Komente
