Deputeti demokrat, Edmond Spaho ka reaguar ndaj Ilir Alimehmetit, një prej figurave më të votuara të PD më 11 maj, i cili kërkoi riformatim të partisë pas humbjes së thellë. Në një postim në rrjete sociale, Spaho thotë se PD thjesht ka nevojë që të organizohet, një proces që sipas tij, i mungon prej 10 vitesh.
Ai bën një krahasim me vitin ’92, teksa thotë se kryetarët e degëve ishin me shkollë të lartë, ndërsa sot “nuk janë as me arsim 8-vjeçar”. Spaho duket se shënjestron dhe figura të larta që merren me organizimin brenda në PD, teksa shkruan se nuk mund të ketë organizim në parti ndërsa në krye vendoset ‘mjeshtri i ç’organizimit’.
Ai preferon të mos flasë me emra, por një gjë dihet, pas Berishës figura kryesore qe merret me organizmin në PD është numri 2, Flamur Noka, ndërkohë që postin e sekretarit Organizativ e mban Ervin Minarolli.
“Sot në degë nuk kemi struktura, nuk kemi drejtues dhe kemi pak anëtarë. Ngopemi me lugë bosh. Është për të ardhur keq, por nëse në vitin 1992 çdo kryetar seksioni ishte me shkollë të lartë, sot një pjesë nuk i kemi as me arsim 8-vjeçar. Me këta përpiqemi t’i bindim qytetarët se jemi alternativë dhe duhet të na votojnë ne.”, thotë ai.
Më tej, ai thotë se partia ka nevojë vetëm për një garë të ndershme zgjedhore brenda vetes të pamanipuluar dhe të pa paracaktuar, duke shtuar se vetëm atëherë do ta konkurronte PS-në.
Reagimi i plotë i Spahos:
I dashur Ilir!
Nuk e kuptoj këtë termin riformatim. Çfarë do të thotë? Duket si tjetërsim, apo modernizim përtej asaj që mund të bëjmë.
Njerëzve të thjeshtë u krijohet përshtypja sikur kush e di se çfarë do të ndodhë. Do shpikim rrotën.
Sipas meje, PD ka nevojë thjesht të organizohet, sepse prej rreth 10 vitesh vetëm është ç’organizuar.
Sot në degë nuk kemi struktura, nuk kemi drejtues dhe kemi pak anëtarë. Ngopemi me lugë bosh.
Është për të ardhur keq, por nëse në vitin 1992 çdo kryetar seksioni ishte me shkollë të lartë, sot një pjesë nuk i kemi as me arsim 8-vjeçar. Me këta përpiqemi t’i bindim qytetarët se jemi alternativë dhe duhet të na votojnë ne.
Gjithçka në degë është vullnetare dhe pa financim, sikurse nuk ka ndodhur kurrë më parë në historinë e kësaj partie, madje as në vitet më të vështira të saj.
Nuk mund të ketë organizim kur në krye të punëve vendos mjeshtrin e ç’organizimit. Ky quhet ç’organizim i organizuar.
Së dyti, nuk kuptoj këtë hapjen. PD ka që nga viti 1997 që është shqyer duke u hapur. Kaq shumë jemi hapur prej vitesh sa na dhembin këmbët. PD nuk ka nevojë as për hapje e as për mbyllje, refren të cilin e dëgjojmë çdo katër vjet kur humbim zgjedhjet.
Ilir, PD ka nevojë vetëm për një gjë: për garë të ndershme zgjedhore brenda saj, të pa manipuluar dhe të pa paracaktuar.
Kur të arrihet kjo, njerëzit do të afrohen në PD dhe ajo do të bëhet e aftë të konkurrojë PS-në dhe të fitojë ndaj Edi Ramës.
Postimi i Spahos
Komente
