Ilir Alimehmeti, Sekretar i Shoqatës së Zyrtarëve të zgjedhur vendorë, thotë se Këshilli Evropian ka afruar me një vit misionin monitorues të implementimit të Kartës Evropiane në Shqipëri, ndryshe nga sa ishte parashikuar për në vitin 2026.
Alimehmeti ka publikuar letrën e marrë nga Kongresi i Autoriteteve Lokale dhe Rajonale të Këshillit, në të cilën thuhet se po monitorojnë me kujdes situatën e vetëqeverisjes vendore në Shqipëri. Alimehmeti shprehet se kjo vjen në përgjigje të ndërhyrjeve sipas tij antikushtetuese të qeverisë në pushtetin lokal.
“Ju falënderoj që na përcollët letrën e hapur nga Shoqata Shqiptare e Zyrtarëve të Zgjedhur Vendorë, të datës 12 korrik 2025, ku shpreheshin shqetësime lidhur me shkeljet e pretenduara të Kartës Evropiane të Vetëqeverisjes Vendore. Dua t’ju informoj se Komiteti i Monitorimit të Kongresit po ndjek me kujdes situatën e vetëqeverisjes vendore në Shqipëri. Ai ka vendosur të rishikojë kalendarin e monitorimit të zbatimit të Kartës në vendin tuaj, i cili fillimisht ishte planifikuar për vitin 2026, duke e zhvendosur atë për semestrin e dytë të vitit 2025. Letra juaj e hapur i është përcjellë raportuesve të Kongresit për zbatimin e Kartës në Shqipëri. Sekretariati do ta mbajë Shoqatën të informuar për vizitën e monitorimit të Kongresit në Shqipëri, në kohën e duhur”, thuhet në letrën që ka marrë Alimehmeti.
Letra vjen pas një shkrese të depozituar nga demokrati më 12 korrik. Teksa ka ndarë letrën, Alimehmeti ka shkruar:
“Në përgjigje të ndërhyrjeve antikushtetuese, antiligjore dhe kundër Kartës Europiane të pushtetit lokal nga ana e qeverisë, pas përpjekjeve dhe takimeve të shumta me diplomatë dhe partnerë ndërkombëtarë Këshilli i Europës (Kongresi i Autoriteteve Lokale dhe Rajonale) vendosi afrimin me një vit të datës së monitorimit të implementimit të Kartës Europiane në Shqipëri në vjeshtën e këtij viti, ndërkohë që ishte prashikuar për vitin 2026”.
Pushteti vendor u prek nga një 'valë dorëheqjesh' pas kritikave të kryeministrit Edi Rama dhe kërkesës për një 'riformartim' total nga drejtorët, nënkryetarët e bashkive dhe deri te drejtuesit e njësive administrative.
Letra që ka marrë Alimehmeti nga Kongresi i Autoriteteve Lokale dhe Rajonale të Këshillit Evropian
Komente
