Pas diplomates amerikane Yuri Kim, edhe ambasadores franceze Elisabeth Barasacq i përfundon mandati.
Nga Korça ambasadorja franceze ka folur në lidhje me reformat e qeverisë e deri tek lufta kundër krimit dhe korrupsionit. E pyetur në lidhje me integrimin e Shqipërisë drejt BE-së, ambasadorja franceze u shpreh se Shqipëria është në fazën ku BE po verifikon se çfarë ka bërë Shqipëria në zbatimin e reformave.
‘Duhet të kujtoj se Shqipëria tashmë është në fazën ku komuniteti evropian po verifikon se çfarë Shqipëria ka bërë në zbatimin e reformave.’- tha Barasacq.
Ajo tha se ka akoma shumë për të bërë në fushën e reformave veçanërisht në luftën kundër korrupsionit e krimit të organizuar.
‘Ka akoma shumë reforma për të bëre në fusha të ndryshme në atë të qeverisjes luftës kundër korrupsionit, krimit të organizuar. Ritmi i shkëmbimeve dhe marrëdhënieve me Bashkimin Europian dhe Shqipërinë është një ritëm që përcaktohet vetëm nga Shqipëria.’- tha diplomatja franceze.
Ambasadorja Franceze në përfundim të mandatit shtoi gjithashtu se në 3 vitet e saj në Shqipëri marrëdhëniet midis dy vendeve janë zhvilluar jashtë mase, por do donte të bënte më shumë pasi në vitin e parë të mandatit të saj ishte vit pandemie.
