Të shtunën Amerika, që është vendi më i goditur nga koronavirusi, ka regjistruar numrin rekord të të prekurve brenda ditës. Siç raporton BBC të shtunën u shënuan më shumë se 66 mijë të prekur, numri më i madh që prej fillimit të pandemisë.
Numri i atyre që kanë ndërruar jetë të shtunën nuk është akoma zyrtar, por të premten ishin 851, duke e çuar numrin total të fatkeqëve që prej fillimit të pandemisë në 136720.
Ndërkohë Trump në daljen e fundit publikë është parë për herë të parë me maskë. Gjatë vizitës në një spital ushtarak në Bethesda, Maryland, disa milje larg shtëpisë së bardhë, presidenti i Amerikës mbante një maskë të zezë.
Për këtë ai u shpreh: "Unë mendoj se është një gjë e shkëlqyeshme ta përdorni maskën kur jeni në spital, kur po flisni me shumë ushtarë dhe njerëz që në disa raste sapo kanë dalë nga salla e operacionit. Unë kurrë nuk kam qenë kundër maskave, por mendoj se duhet të vlerësojmë kohën dhe vendin."
