Gjykata e Apelit ka lënë në fuqi masën e ‘arrestit në burg’ për biznesmein Erdion Muho, i akuzuar për veprën penale ‘Shkatërrimi i pronës me eksploziv’ kryer në bashkëpunim dhe mbetur në tentativë.
Më herët ishte Gjykata e Sarandës që kishte caktuar arrestin në burg për Muhon më datë 30 korrik, teksa policia e kishte ndaluar më datë 28 korrik të këtij viti.
Muho është pronar i një agjencie turistike në Sarandë. Kompania e tij operon në fushën e transportit ndërkombëtar detar të udhëtarëve të linjës Sarandë-Korfuz.
'Çështja në apel u shqyrtua mbi bazën e ankimit të bërë, nga personi nën hetim me iniciale E. M, i cili kërkoi ndryshimin e vendimit të Gjykatës dhe revokimin e kërkesës së organit të akuzës.
Në përfundim të gjykimit, më datë 13.08.2024, Gjykata e Apelit të Juridiksionit të Përgjithshëm, e përbërë nga trupi gjykues me Relator Gjyqtar z. Qemal Zaimi, vendosi:
-Miratimin e vendimit penal Nr.23-2024-1488 datë 30.07.2024 të Gjykatës së Shkallës së Parë të Juridiksionit të Përgjithshëm Sarandë.', thuhet në vendimin e Gjykatës së Apelit të Juridiksionit të Përgjithshëm.
Ngjarja për të cilën u ndalua, ka të bëjë me eksplozivin që plasi në afërsi të Portit të Sarandës, mbrëmjen e 24 qershorit të këtij viti, ku mbeti i vdekur 52 vjeçari Armand Nelaj, mik i Muhos dhe biznesmen në fushën e makinerive të ndërtimit.
Eksplozivi kishte për qëllim tragetin turistik të një kompanie rivale me kompaninë e Muhos në transportin e udhëtarëve Sarandë-Korfuz. Për këtë Muho ia kishte lënë eksplozivin Nelajt që tia vinte anijes rivale.
Por lënda shëprthyese plasi para kohe për shkak të telefonit të Nelajt, duke mos shpërthyer në objektin e synuar por në duart e Nelajt i cili humbi jetën.
G.K/ReportTv.al